Лам нарыг тагнуулч болгоно

Төвд лам нарт сөрөг тагнуулын үйл ажиллагаа явуулах үндэст Хятадын засаг захиргаа сургаж эхэлсэн талаар "Ucanews” мэдээллээ.

Дотоодын хэрэгт оролцох, тагнуул хийхтэй тэмцэхэд чиглэсэн шинэ хуулийг Хятадад саяхан баталсан юм.

Энэтхэгтэй хил залгаа Ламалинг сүмд эхний 22 ламыг сургасан байна. Энэ бүст цэргийн байгууламж их учир ингэж сургах нь чухал ач холбогдолтой хэмээн Төвдийн Шинжлэх ухааны академийн хүрээлэнгийн захирлын орлогч Пенпа Лхам ярьсан аж.

Төвдөд тагнуулын ажиллагаа явуулсан шинж тэмдэг илэрсэн тохиолдолд хууль сахиулах байгууллагад мэдээлэх ажлыг зохион байгуулах тухай өмнө нь засаг захиргаанаас мэдэгдэж байсан юм. Учир нь энэ бүст салан тусгаарлах хөдөлгөөнийг барууны орнууд дэмждэг хэмээн Хятад үздэг билээ.