БНСУ-тай хамтарч Эрдэнэт хотод орон сууцны хороолол барина

Аймгийн Засаг дарга Д.Батлут БНСУ-ын Шихэн хотод айлчилж хамтран ажиллахаар болсон талаар бид урьд нь мэдээлсэн. Тэгвэл Шихэн хотын төлөөлөгчид энэ сарын 19-нд манай хотод ажиллалаа. Эрдэнэт хот БНСУ-ын Шихэн хоттой хамтран ажиллахаар болсон чиглэлүүдийн дунд гэр хорооллыг дахин төлөвлөх, орон сууцжуулах ажил туссан.

Тиймээс тус хотын төлөөлөгчид манай хотод ажиллахдаа орон сууцны хороолол барих боломжтой газруудтай танилцлаа. Орон нутгийн удирдлагууд хамтын ажиллагааны хүрээнд орон сууцны хороолол барих боломжтой гэж үзэж буй таван байршлыг танилцуулсан юм. Тодруулбал, 2400 айлын орон сууц барихаар төлөвлөөд буй 7А хорооллын нийт газрын 40 гаруй хувьд нь Чех Улстай хамтран орон сууц барьж байгаа бөгөөд эхнээсээ ашиглалтад ороод байна. Үлдсэн хэсэгт нь БНСУ-ын Шихэн хоттой хамтран орон сууцны хороолол барих боломжтой.

Мөн журмын хашаа буюу "Танил” техникийн зах орчмын 55х60 метр талбай, "Эрдэнэт хивс” компанийн замын эсрэг талын 5 га газар болон Цэнгэлдэх хүрээлэн орчмын тодорхой хэсэгт орон сууцны хорооллын төсөл хэрэгжүүлэх боломжтой гэж үзэж буйгаа ГХБХБГ-ын дарга Г.Цолмон илэрхийлсэн. Тус хотын төлөөлөгчдийг аймгийн Засаг даргын орлогч А.Түвшинжаргал хүлээн авч уулзсан юм.

Тэрээр хамтран ажиллахдаа Монгол Улсын хууль, тогтоомжийг сайтар дагаж мөрдөх хэрэгтэйг онцлон хэллээ. БНСУ-ын Шихэн хотын төлөөлөгчид эх орондоо очоод дээр дурдсан газруудтай холбоотой бүх талын судалгааг хийх юм байна. Ингэснээр орон сууцны хороолол барих газраа сонгож, хамтын ажиллагааны дараагийн үе шат эхлэх аж.

erdenet.mn

БНСУ-тай хамтарч Эрдэнэт хотод орон сууцны хороолол барина

Санал болгох

Сэтгэгдэл