Орхон аймгийн Засаг дарга Д.Батлут өвөлжилт хүндэрсэн хэсгүүдэд ажиллаж байна

Орхон аймгийн Засаг дарга Д.Батлут Жаргалант сумын өвөлжилт хүндэрч буй хэсгийн малчин өрхүүдэд очлоо. Тэрбээр АИТХ-ын тэргүүлэгч Д.Эрдэнэбат, Жаргалант сумын Засаг дарга Б.Зоригтбаяр болон ОБГ-ын алба хаагчид, Эрүүл мэнд, нийгмийн даатгалын хэлтсийн байцаагч, хүн, малын эмч зэрэг хүмүүсийн баг бүрэлдэхүүнтэйгээр явсан юм.

Энэ жилийн хувьд цас их орсон, малчид бэлтгэсэн өвс, тэжээлээ хэрэглэж дууссан, мал сүргийн дийлэнх нь тамирдсан байгааг малчид хэлж байв. Жаргалант сумын Засаг дарга Б.Зоригтбаяр "Манай сумын хэмжээнд мал бүхий 650 өрх өвөлжиж байна. Цасны зузаан 45-50 см болсон. Сумын ЗДТГ-аас нөөцөд авсан 150 тонн өвс, 100 тонн тэжээлийг айлуудад олгосон. Одоо 6200 боодол өвсийг дахин олгохоор ажиллаж байна. Үүнийг хүнд нөхцөлд байгаа айлуудад олгоно” гэлээ. Мөн Улсын онцгой комиссоос манай аймагт 50 тонн өвс, 50 тонн тэжээл өгөхөөр болсон. Үүнийг ирэх хоёрдугаар сарын эхээр хуваарилах юм байна.

Аймгийн Засаг дарга Д.Батлут өвөлжилт хүндэрч буй айлуудад очихдоо тус бүрт нь найман шуудай тэжээл, иргэд, ААН-ээс цугларсан лаа, чүдэнз, гар чийдэн тэргүүтэй бараа таваарыг олгосон байна.

Мөн Эрүүл мэнд, нийгмийн даатгалын хэлтсээс дээрх өрхийн гишүүдийг эрүүл мэндийн даатгалд хамруулж, энэ оны эхний гурван сарын төлөлтийг нь хийж өгсөн юм. Мөн хүний эмч малчдад эрүүл мэндийн үзлэг хийж, шаардлагатай эм, эмнэлгийн хэрэгслийг олгож, малын эмч мал сүргийн байдалтай танилцаж, малчдад малын өвчлөлийн үед хэрхэн хандах талаар зөвлөгөө өглөө. Засаг дарга өнөөдөр буюу нэгдүгээр сарын 26-нд Баян-Өндөр сумын мал бүхий өрхүүдэд ажиллана.

Дашрамд дурдахад, Аймгийн хэмжээнд мал аж ахуйн өвөлжилт хүндэрч байгаа тул малчдад хүрч ажиллах ажлын хэсэг байгуулагдан есөн чиглэлд ажиллаж байгаа юм.

Орхон аймгийн Засаг дарга Д.Батлут өвөлжилт хүндэрсэн хэсгүүдэд ажиллаж байна

Санал болгох

Сэтгэгдэл