Чигун эрүүлжүүлэх дасгал

Чигун дасгалыг шинэ чулуун зэвсгийн үед хэрэглэж байсаныг археологийн олдворууд баталдаг байна. Эрт цагийн хүмүүс үл ойлгогдох хөдөлгөөн хийж бүжиглэх, өөр хоорондоо иллэг массаж хийж байсан гэнэ. Тэр үед Чигун «氣功» хэмээх нэр томъёо байхгүй байсан ч тэрхүү хөдөлгөөн болон дасгалыг «导引, dao yin» буюу эрэл гэж нэрлэдэг.

Зураг дээр: «导引, dao yin» буюу эрэл дасгалын сурах бичиг.

Зөв хөдөлгөөн хийнэ гэдэг бол эрүүлжих дасгал бөгөөд энэ тухай өгүүлсэн хамгийн эртний шастир бол Шар хааны "Доторын тухай” хэмээх судар болно. Түүнд өгүүлэхдээ "Эртний хүмүүс зэрлэг араатан, шувуудын дунд амьдарч байхдаа зуны халуун, өвлийн хүйтнийг тэсч давахын тулд тэдний хөдөлгөөнийг ашиглаж байлаа” гэж бичсэн байдаг.

Хөдөлгөөн хүн төрлөхтөнд гадна орчны нөлөөнөөс таагүй нөлөөнөөс аврах, эрүүл мэндийг хамгаалах, янз бүрийн өвчнийг анагаахад их үүрэг гүйцэтгэдэг байна. Жишээ нь:

Унтаж сэрээд сайтар суниах, эвшээх, өөрийгөө илбэл сэтгэлийн тайвшрал, баяр баясгалан авчрах мэдрэмж өгдөг. Хэрэв нуруугаар өвдвөл иллэг хийх, зөөлөн тогшиход өвдөлт намждаг. Гэдэс зангирвал хоёр алгаараа гэдсээ дулаацуулан, хөл дээрээ суувал (бааж байгаа мэт) гэдэсний зангираа үгүй болдог. Цээжинд ямар нэгэн түгшүүр хорогдоод байвал гүн амьсгал авах зэрэг үйлдэл хийдэг. Энэ бүх хөдөлгөөний цогц дасгалыг «Чигун» гэж нэрлэдэг байна.

«Чигун» 氣功 гэдэг нь Чи (氣)-Амьдралын энерги, хүч, Гун - (功) хөдөлгөөнийг ухаанаар удирдах гэсэн утгатай юм. Өөрөөр хэлбэл Энергийн хүчийг хөдөлгөөний ухаанаар удирдах дасгал юм.

«Чигун» дасгал бол бие организмийг эрүүлжүүлэх Эртний Хятадын цорын ганц дасгал бөгөөд амьдралын эрч хүчийг удирдах ухаан юм.

Энэ дасгалыг хийхдээ маш тайван нөхцөлд зүрх болон ухаан санаагаа бүрэн төвлөрүүлж хийнэ. Дасгал хийж байх үедээ хэмнэлтэйгээр жигд амьсгалж, бүх хөдөлгөөнийг нарийн нямбай, тасралтгүйгээр хийнэ.

Орчин үед Хятадад Бүддийн, даогийн, конфуцийн, төвдийн гэх мэт «Чигун» дасгалын сургалт явагдаж байна. Тэдгээр сургалт бүхэн өөр өөрийн зорилго үүрэгтэй байдаг. Мөн анагаах дасгал, эрүүлжих дасгал гэж ялгаатай байдаг. Дасгалууд нь эр зоригийн, биеийн тамирын, хурц, зөөлөн гэх өөр өөрийн онцлогтой.

Зураг дээр: Чигүн 氣功 дасгал хийж байна.

«Чигун» дасгал нь хоёр хэлбэртэй байх бөгөөд Динамик (гадна), Статик (дотоод) гэж байна.

Статик хэлбэрийн «Чигун» дасгал нь гүн гүнзгий, хэмнэлтэйгээр жигд хамраараа амьсгалж, тайван дөлгөөн хөдөлгөөнөөр амьдралын «Чи» энерги рүүгээ хандсан байдаг. Энэ хэлбэр цусны эргэлтийн систем, хоол боловсруулах эрхтэн, төв мэдрэлийн системд таатай нөлөө үзүүлдэг.

Динамик хэлбэрийн «Чигун» дасгал нь идэвхитэй ачаалал өгч, бүх организмийн чилээг тайлж, эрүүл мэндийг ерөнхийд нь бэхжүүлэх үүрэгтэй юм.

Орчин үед судлаачид «Чигун» дасгалын ангилал, чиглэлийг олон талаас нь судлан өөрсдийн дүгнэлтээ хийсэн байдаг. Жишээ нь:

Бие хамгаалах урлагын мастерууд «Чигун» дасгалыг янз бүрийн бэртэлтийг эмчлэх талаас нь судлаж, анхаарал төвлөрүүлэх дээд шатны сургалт болгосон байна.

Хятадын уламжлалт анагаах ухааны эмч нар «Чигун» дасгалын хязгааргүй боломжуудыг нээн илрүүлж, эрүүл энх, урт удаан жил амьдрах арга хэрэгсэл болгон хөгжүүлжээ.