ИНЕГ-ын албан тасалгаанд архидаж, ажилтнаа “Ална” хэмээн занасан Нэргүй гэгч хуучин дарганцар нь цагдаад шалгагдаж байна

Иргэний нисэхийн ерөнхий газар гэж нэг завхарсан байгууллага байх юм. Жилийн жилд идэж уусан, архидсан, эх захаа алдсан хэл аманд өртөнө. Нэг эхийн эвэр доргивол мянган үхрийнх нь ч доргиж л байдаг хойно, тэнд архины лонх хангинахад л хаа холын Хөвсгөл, Увсад дуулдаж байна. Хэтрүүлэл хэмээн эндүүрэв. Цахим сүлжээ үнэндээ дэлхийн хаана ч хормын төдийд хүрдэг юм чинь.

Саяхан ИНЕГ-ын Санхүү эдийн засгийн газрын дарга Нэргүй ажлаа өгч, оронд нь Дагвадорж гэдэг нөхөр томилогджээ. Ажил хүлээлцсэн мань хоёр албан өрөөндөө архидаж, алба амь хослуулан баахан бурцгаажээ. Ажлын байранд архидан согтуурахыг хориглоод удаж байгаа ч энд иймэрхүү хууль журмыг мөрддөггүй бололтой.

Архинд халамцсан Нэргүй нь гаднаас аж ахуйн албаны дарга Ганбаатар гэгчийгээ дуудаж ирүүлээд Дагвадорждоо үүрэгдэх маягтай "Чи энэ нөхрийг эндээс зайлуулаарай. Хогийн эр байгаа юм” гэснээс үүдэн тэдний дунд хэрүүл маргаан үүсэх нь тэр. н.Нэргүй нь сүүлдээ н.Ганбаатарыгаа ална, хядна хэмээн сүрийг үзүүлжээ. Ганбаатар нь албан өрөөнд юу ч болж мэдэх нь гэж бодоод яаравчлан хэв журам сахиулахаар цагдааг дуудуулсан байна. Удалгүй цагдаа ирж архинд нэвчихээ шахсан шинэ, хуучин дарганцаруудын ааг омгийн дарж, ажлын байрнаас нь гаргаж явуулжээ. Ганбаатар харин хамт ажиллаж байсан Нэргүй гэгч даргынхаа "Ална, хядна” гэсэнд голдоо ортол гомдож, ер нь хэзээ нэгэн цагт энэ заналхийлэл биелэх ч юм билүү гэж бодоод цагдаад өргөдөл гомдлоо бичиж өгчээ. Одоо Нэргүй нь цагдаад шалгагдаж байгаа юм байна. Иргэний нийсэхийн ерөнхий газрын нэг өдрийн зарим дүр зураг ерөнхийдөө иймэрхүү. Эндэхийн Т.Лхагвасүрэн дарга нь удахгүй солигдох сурагтай. Хэрвээ тэр ажлаа өгвөл бас хэнийг нь "Ална” гэж занах бол оо.

Б.Отгонбаяр

Эх сурвалж: Tumen.mn