Кастрогийн үхэлд харуусах бас хагартлаа баярлах хүмүүс байна. Миамид хүмүүс Кастрогийн үхлийн талаар сонсоод Бямба гаригаас хойш үдэшлэг зохион байгуулж байгаа гэнэ. Хаванад ч анти-Кастро үзэлтэй эсэргүүцэгчдийн хувийн үдэшлэгүүд болж байгаа гэсэн цуурхал байна. 

Үүнд дургүйцсэн хүмүүс "Хэн ч үхлийг тэмдэглэж болохгүй. Хэдийгээр Жон Кеннеди манай улс руу дайрч байсан ч бид түүний үхлийг тэмдэглээгүй шүү дээ" гэжээ. 

Хүмүүс Хаванагийн кадетрал сүм Кастрогийн үхэлд эмгэнэж, цөөн хэдэн үг хэлэхийг хүлээж байв. Гэсэн ч ромын католик сүм Кастрог эргэн дурсахыг хүссэнгүй бололтой. Учир нь тэдний хувьд Фидель бол шашин шүтэх эрх чөлөөг боомилсон нэгэн. 

"Кубын дарангуйлагч эцэст нь нас барлаа. Гэхдээ одоо ахынхаа орыг залгамжилсан Раул гэдэг нэг хүч үлдсэн". Олон хүн дараа нь юу болох бол гэдэгт анхаарал хандуулж байна. Хэн ч үймээн самуун болохыг хүсэхгүй. Гэхдээ Фидель Кастрогийн үхлийн дараа дүү Раул нь ерөнхийлөгчийн албан тушаалаас сайн дураараа огцорч, удирдлагын шинэ үеийг гаргаж ирэхийг битүүхэн хүсч байна. 

Тэдний нэг нэрээ нууцалсан архитектурч "Кастро өөрийгөө хаан эзэн болгох систем байгуулсан. Урт удаан насалсан хаан нас барлаа. Би зүгээр л энэ орон хаант улс битгий болоосой гэж хүсч байна" гэжээ. 

ЗХУ-ын Владимир Ленин, Хятадын Мао Зедун, Вьетнамын Хо Чи Минийг нас барахад тэдний биеийг занданшуулж, бунхан босгож байсан. Гэсэн ч Фидель Кастро өөрийгөө чандарлуулахыг хүсчээ. Тиймээс түүнийг дурсан санахын тулд хөшөө босгож, ямар нэг гудамжийг түүний нэрээр нэрлэх аж.