Show user posts tonshuul - ErdenetMedee.mn

ТУРК УЛС МОНГОЛД ЗЭЭЛ ОЛГОЖ, ХӨРӨНГӨ ОРУУЛАЛТ ХИЙХ СОНИРХОЛТОЙ БАЙГААГАА ИЛЭРХИЙЛЭВ

tonshuul — Tue, 13 Mar 2018 08:29:49 +0800

УИХ-ын дарга М.Энхболд Бүгд Найрамдах Турк Улсын Үндэсний Их Хурлын дарга Исмаил Кахраманы урилгаар тус улсад албан ёсны айлчлал хийх үеэрээ Истанбул хотод зочилж, тус улсын ЭКСИМ банкны удирдлагуудтай уулзлаа.

Уулзалтад Туркийн талаас ЭКСИМ банкны Дэд захирал Корай Эрдэн, олон улсын төслийн зээл хариуцсан захирал Сюзан Уста, олон улсын худалдаа, санхүүгийн асуудал хариуцсан захирал Үмүт Топал нар оролцож, банкны үйл ажиллагаа, Монгол Улстай тогтоосон харилцаа, хамтын ажиллагааны асуудлаар танилцуулга хийлээ.

Туркийн төрийн мэдлийн ЭКСИМ банк нь гадаадын улс орон, дотоодын бизнес эрхлэгчдэд төслийн зээл болон зээлийн эрсдэлийн даатгалын үйлчилгээ үзүүлдэг томоохон банк юм. 2017 онд гэхэд 40 тэрбум ам.долларын зээл олгожээ.

Тус банкны онцлог нь Туркийн хөрөнгө оруулагчид гадаад улс оронд төсөл хэрэгжүүлэхэд дэмжлэг үзүүлж зээл олгодог бөгөөд тухайн улсын Засгийн газрынх нь болон банкуудын баталгааг шаарддаг, хүүгийн хувьд нэлээд өндөр буюу 7 орчим хувьтай байдаг ажээ. Монголын ХААН, Голомт, Хөгжлийн банкинд зээлийн шугам нээж, хамтран ажиллаж байгаа аж.

Уулзалтын үеэр УИХ-ын дарга М.Энхболд тус улсын Ерөнхийлөгч Р.Т.Эрдоантай уулзах үеэрээ Орхоны хөндийд аялал жуулчлалын цогцолбор байгуулах, Улаанбаатар хотын агаар, орчны бохирдлыг бууруулах, нийтийн тээврийн үйлчилгээг сайжруулах зэрэг тодорхой төслүүдийг хэрэгжүүлэх асуудлыг ярилцан, тохиролцсон. ЭКСИМ банкнаас 300 сая ам.долларын зээл авах асуудал олон жил яригдлаа. Зээлийн шугам нээгдсэн боловч бүрэн тохиролцоонд хүрч чадалгүй өдий хүргэснийг нэг мөр шийдэж, дээр дурдсан болон бусад төслүүдийг хэрэгжүүлэх нь ирэх жил тохиох хоёр орны хооронд дипломат харилцаа тогтоосны 50 жилийн ойд та бидний барих бэлэг болно. Зээлийн хүү өндөр, баталгаа шаарддаг гэсэн хоёр асуудал бий. Ах дүү улсын хувьд асуудлыг хөнгөлөлттэй нөхцөлөөр шийднэ гэдэгт итгэж байна. Дөрөвдүгээр сард Туркийн Ерөнхий сайд Бинали Йылдырымийг Монголд айлчлуулах асуудлыг ярьж байгаа. Мөн удахгүй Монгол-Туркийн Засгийн газар хоорондын комиссын хуралдаан Улаанбаатарт болно. Эдгээр арга хэмжээний үеэр асуудлыг эцэслэн шийдэх нь чухал хэмээн онцоллоо.

ЭКСИМ банкны дэд захирал Корай Эрдэн "Бид зөвхөн Монгол Улсад зориулсан тусгай гарц олохыг хичээж байна. Монголын талын санал санаачилгыг хүлээж авахад бэлэн. Тухайлбал, зээлийн төлбөрийг бүтээгдэхүүнээр хийж болно. Зээлийн хэмжээг 350 сая ам.долларт хүргэх боломжтой гэж бид шийдсэн” гэв.

Эдгээр шийдэл өмнөх өдөр нь М.Энхболд, Р.Т.Эрдоан нарын ганцаарчилсан уулзалтын үеэр ярьж тохирсон зүйлүүд юм. Монгол орон, монголчуудыг элгэн саднаа гэж тооцдог туркчуудийн хүндлэл, М.Энхболд, Р.Т.Эрдоан нарын хувь хүмүүсийн нөхөрлөл, дотночлол энэ нааштай алхамд нөлөө үзүүлсэн байна
.
Мөн өдөр УИХ-ын дарга М.Энхболд Туркийн Гадаадтай эдийн засгаар харилцах зөвлөл (DIEK)-ийн удирдлагуудтай уулзалт хийв. Энэхүү уулзалтыг өндөр түвшинд, тусгайлан бэлтгэж хийх талаар Ерөнхийлөгч Р.Т.Эрдоан үүрэг өгсөн гэж Зөвлөлийн тэргүүн Нэйл Олпак, Зөвлөл дэх Турк-Монголын эдийн засгийн хамтын ажиллагааны хорооны дарга Чэнгиз Гул нар онцоллоо.

Зөвлөлийн бүрэлдэхүүнд багтдаг хамтын ажиллагааны улс орон хариуцсан хороо 144 байдаг аж. Уулзалтад Туркийн нэр хүнд, туршлага, чадавхиараа Туркт төдийгүй дэлхийд үнэлэгддэг томоохон аж ахуйн нэгжийн 20 шахам удирдлага ирсэн байв. Тэдгээр нь уул уурхай, өнгөт болон хар төмөрлөг, мах, махан бүтээгдэхүүн, газар тариалан, ноос ноолуур, нэхмэл сүлжмэл, авто зам, тээвэр, хот байгуулалт, орон сууц, эрчим хүч, төмөр зам, зочид буудал, аялал жуулчлал, боловсрол, эрүүл мэнд гэх мэт бүхий л салбарт үйл ажиллагаа явуулдаг аж.

Тэд өөрсдийн үйл ажиллагааны чиглэл, цар хүрээний талаар танилцуулж, Монголтой хамтран ажиллаж, төсөл хэрэгжүүлэх сонирхлоо илэрхийлж байлаа.

Уулзалтын төгсгөлд УИХ-ын дарга М.Энхболд Монгол, Туркийн бизнес эрхлэгчдийн хооронд амьд хэлхээ холбоо тогтоож, харилцан ашигтай хамтын ажиллагаа өрнүүлэх сайхан эхлэл тавигдаж байна хэмээн онцлоод, "Энд яригдсан асуудлууд, тодорхой саналуудыг ажил хэрэг болгоход бид онцгой анхаарна. Монгол Улс Европын холбоотой "Түншлэл, хамтын ажиллагааны хэлэлцээр” байгуулсан. 7200 нэрийн бүтээгдэхүүнийг Европын холбооны 28 оронд татваргүй гаргах боломжтой. Орос, Хятад хэмээх дэлхийн хоёр том зах зээлтэй хаяа дэрлэн оршдог. Ази-Европыг холбох хамгийн дөт замын зангилаан дээр байрлалтай. Ази, Номхон далайн бүс нутагтаа хамгийн бага татвартай улс бол манайх. Энэ мэт давуу талууд бизнест сайнаар нөлөөлөх нь дамжиггүй. Та бүхнийг Монголд урьж байна” гэлээ.

УИХ-ын дарга М.Энхболд энэ өдөр Туркт ажиллаж, амьдарч буй монгол иргэдийн төлөөлөлтэй уулзлаа. Уг уулзалтыг Истанбул хот дахь Монгол Улсын Ерөнхий консулын газар (Консул Э.Мөнх-Очир) зохион байгуулсан юм гэж УИХ-ын Хэвлэл мэдээлэл, олон нийттэй харилцах хэлтсээс мэдээллээ.

Н.Цэрэнбат: Монгол Улсын аялал жуулчлалын маршрутыг ирэх сард батлуулна

tonshuul — Tue, 13 Mar 2018 08:16:04 +0800

Улаанбаатар /МОНЦАМЭ/. Байгаль орчин, аялал жуулчлалын салбарын Нээлттэй өдөрлөгийг энэ сарын 14-21-ний өдрүүдэд орон даяар зохион байгуулах болжээ. Энэ талаар болон тус салбартай холбоотой нийгмийн анхаарлыг татсан бусад асуудлаар Байгаль орчин, аялал жуулчлалын сайд Н.Цэрэнбат өнөөдөр мэдээлэл хийлээ.

Долоо хоногийн хугацаатай үргэлжлэх Нээлттэй өдөрлөгөөр тус салбарын хүрээнд иргэдээс ирүүлсэн санал гомдлыг бүртгэлжүүлж, цаашдын үйл ажиллагаагаа хэрхэн сайжруулах талаар зөвлөмж хүргүүлэх юм байна. Мөн БОАЖ-ын салбарт хийж хэрэгжүүлж буй ажлын талаар дэлгэрэнгүй мэдээлэл өгч, танилцуулга хийхээр төлөвлөжээ.

Мэдээллийн дараа БОАЖ-ын сайд Н.Цэрэнбат сэтгүүлчдийн асуултад хариулсан юм.

-Дулааны улирал ирж, утаа харьцангуй багасахтай зэрэгцэн энэ сэдэв дарагддаг. Агаарын бохирдлыг бууруулах ажил юу болж байгаа вэ. Одоо ямар ажил хийгдэж байна вэ?

-Агаар, орчныг бууруулах Үндэсний хороо хуралдаж тодорхой ажлууд хийхээр баталсан. Энэ хүрээнд яам, Нийслэлийн Засаг даргын тамгын газартай хамтран хэд хэдэн ажлууд хийгдсэн. Зарим ажил нь судалгааны дүгнэлт дээр байна. Үндэсний хороо энэ долоо хоногт хуралдаж, 2018 онд хийх ажлын төлөвлөгөө болон гүйцэтгэх ажлуудтай танилцана.

-Цэвэрлэх байгууламжийн асуудал ямар шатандаа явж байна вэ?

-Барилга, хот байгуулалтын яаманд Цэвэрлэх байгууламжийн нэгдсэн бүтээн байгуулалттай холбоотой ажлын хэсэг гараад ажиллаж байна. Дэд ажлын хэсгүүдийн ажил хэвийн үргэлжилж байна. Шинээр баригдах Цэвэрлэх байгууламжид тавигдах байгаль орчны үнэлгээ, лагны үнэр дарах, тээвэрлэх чиглэлээр мэргэжлийн зөвлөгөөгөө өгсөн. Ажлын хэсгүүд хуралдаж, эцсийн шийдээ гаргаагүй байгаа.

-Та "ITB Berlin-2018”-д оролцоод ирсэн. Манай улс 1 сая жуулчин хүлээж авна гэсэн зорилт тавьсан. Энэ зорилгыг биелүүлэхийн тулд хийх гол ажил юу байна вэ?

-Аялал жуулчлалын шугамаар ирэх жуулчны тоог нэг саяд хүргэх зорилго тавиад ажиллаж байгаа. Сая Берлинд болсон үзэсгэлэнд Монгол Улс сүүлийн 14 жилийн турш оролцож байна. Гэтэл бидэнтэй хамт энэ үзэсгэлэн ороод явж байсан улсуудын аялал жуулчлалын салбар сайн хөгжсөн байна. Тиймээс жуулчин хүлээж авах аялал жуулчлалын маршрутыг яамнаас боловсруулж, дөрөвдүгээр сард Засгийн газрын хуралдаанаар батлуулахаар ажиллаж байна. Энэ маршрут батлагдвал Монгол Улс аялал жуулчлалын салбарт ямар бодлого, чиглэл баримтлах нь тодорхой болно. Засгийн газар аялал жуулчлалын салбараас олох орлогоо дээшлүүлэхийн төлөө анхаарч ажиллана.

-Ногоон зээлийн сан байгуулах ажил ямар шатандаа яваа бэ?

-Энэ сангийн Монголын талын ТУЗ өнгөрсөн долоо хоногт хуралдсан. Хоёр талаасаа ойлголцож чадвал зургадугаар сараас хэлэлцээр эхэлж, аравдугаар сард ажил эхэлнэ гэсэн төсөөлөлтэй байна.

-Шонхор барих зөвшөөрөл олгохтой холбогдуулан маш их шүүмжлэл гардаг. Энэ төрлийн зөвшөөрөлд хязгаарлалт тавих уу?

-Намайг сайдын ажил авснаас хойш шонхортой холбоотой асуудал яригдаагүй. Шонхор барих зөвшөөрөл олголтыг хориглосон хэвээр байна.

-Агнуурын нөөцгүй бүсэд зөвшөөрөл өгсөн асуудал бий юу?

-Агнуурын нөөцгүй бүсэд зөвшөөрөл өгсөн зүйл байхгүй. Ан агнуурын зөвшөөрлийг 20 орчим ААН-д өгдөг. Зөвшөөрлийг олгохдоо ил тод байх үүднээс нээлттэй явуулах зарчим баримтална. ААН-үүд өөрсдөө Монгол төрийн бодлогыг хүндлэх хэрэгтэй. Асуудлуудаа бид нэгтгээд, хаана хаана ямар асуудал байгааг эрэмбэлж, шийднэ.

-Нөхөн сэргээлт улсын хэмжээнд хэр үр дүнтэй хийгдэж байна бэ?

-Нөхөн сэргээлттэй холбоотой хууль тогтоомжийн биелэлт өнөөдөр муу хэрэгжиж байна. Тухайн орон нутгийн ИТХ нөхөн сэргээлтээс олсон орлогоо зориулалтын бусаар зарцуулдаг. Энэ нь маш их асуудал үүсгэж байна. Энэ асуудлыг зайлшгүй засах хэрэгтэй. Зарцуулах ёстой мөнгөө бүгдийг нь зарцуулж хэвших ёстой. Иргэд итгэл хүлээж гарч ирсэн орон нутгийн ИТХ-ын төлөөлөгчид энэ чиглэлд илүү санаачлагатай ажиллах шаардлагатай байна.

-Богд уулын тусгай хамгаалалттай газар тойроод барилга баригдаж байгаа асуудал шүүмжлэл дагуулдаг. Үүн дээр салбар яам ямар бодлого барин ажиллах бэ?

-Би Богд уултай холбоотой 2-3 зөвшөөрлийг цуцалсан. Манай яаманд ирж байгаа гомдлын бараг 80 гаруй хувийг Богд уултай холбоотой асуудал эзэлж байна. Тиймээс энэ асуудалд тусад нь ажлын хэсэг гаргаад ажиллаж байна. Манайтай холбоотой Богд уулын зургаан ам байдаг. Эдгээр амуудад аялал жуулчлалыг хөгжүүлэх чиглэлд салбар яам анхааран ажиллана.

Н.Гантуяа

Гэрэл зургийг Б.Чадраабал

Эх сурвалж: Монцамэ агентлаг

Хятадын үндсэн хуульд нэмэлт өөрчлөлт оруулах төслийг батлав

tonshuul — Tue, 13 Mar 2018 08:04:57 +0800

11-нд Бээжин хотноо XIII сонгуулийн БХАТИХ-ын анхдугаар чуулган III бүгд хурлаа хуралдуулж, "БНХАУ-ын үндсэн хуульд нэмэлт өөрчлөлт оруулах төсөл”-ийг олонхын саналаар баталсан байна. Хятад улсын төр засгаа засах, тайван тогтуун байдалтай холбоотой ерөнхий дүрэм тогтоолыг хамарсан үндсэн хууль 14 жилийг дараа шинэ эриний шинэ агуулгыг багтаах боллоо.

БХАТИХ-ын Байнгын хорооны Хууль зүйн ажлын хорооны дарга Шэнь Чүньяо хурлын дараах хэвлэлийн бага хуралд: Үндсэн хуульд нэмэлт өөрчлөлт оруулах нь Хятад улсын улс төрийн том ажил юм. Шинэ эриний Хятадын онцлогтой социализмын нөхцөл байдал дахь Хятад улсын хуулийн засаглалын бүтээн байгуулалтын том ололт амжилт юм. Үндсэн хуульд нэмэлт өөрчлөлт оруулах төслийг баталсан нь ХКН болон улс орны ажил үйлсийн хөгжлийг эрчтэй ахиулан баталгаажуулж, Хятадын социалист хуулийн засаглалын бүтээн байгуулалтыг эрчтэй хөгжүүлэн чангатгах болно гэжээ.

XIII сонгуулийн БХАТИХ-ын анхдугаар чуулганы III бүгд хуралд БХАТИХ-ын 2964 төлөөлөгч нууцаар санал өгөх хэлбэрээр үндсэн хуульд нэмэлт өөрчлөлт оруулах төслийн тухай санал оруулж, 2958 дэмжсэн, 2 татгалзсан, 3 түдгэлзсэн санал өгчээ. XIII сонгуулийн БХАТИХ-ын анхдугаар чуулганы төсөлд санал өгөх тогтоолын дагуу, үндсэн хуульд нэмэлт өөрчлөлт оруулах төслийн тухай нууцаар санал хурааж, нийт төлөөлөгчдийн гурваны хоёр хувиас дээш дэмжсэн санал авч батлагдсан байна. Мөн өдөр XIII сонгуулийн БХАТИХ-ын анхдугаар чуулганы тэргүүлэгчид мэдэгдэл гаргаж, үндсэн хуульд нэмэлт өөрчлөлт оруулсан төслийг хэрэгжүүлэхээ мэдэгджээ.

Чуулганы дараа мэдээллийн төвд тусгай хэвлэлийн бага хурал хийж, Шэнь Чүньяо: Энэ удаагийн үндсэн хуульд нэмэлт өөрчлөлт оруулах ажлыг хуулийн дагуу явуулж, ХКН-ын XIX их хурлаар тогтоосон чухал онол үзэл баримтлал, чухал чиглэл бодлогыг үндсэн хуульд оруулах зорилгоо биелүүлж, нам төрийн ажил үйлсийн шинэ амжилт, шинэ туршлага, шинэ шаардлагыг харуулж, ерөнхийдөө үндсэн хуулийн үргэлжилсэн, тогтвортой чанар, нэр хүндийг баталгаажуулсны үндсэн дээр үндсэн хуулийг цаг үетэй уялдуулж, боловсронгуй болголоо гэжээ.
Шинээр батлагдсан Үндсэн хуулийн өөрчлөлт оруулсан төсөл нийт 21 заалттай. Түүнд "Ши Жиньпиний шинэ эриний Хятадын онцлогтой социалист үзэл баримтлал” -ын Хятадын улс төр, нийгмийн амьдрал дахь удирдах байр суурийг тодорхойлжээ. Шэнь Чүньяо хэлэхдээ: Хятадын үндсэн хуулийн нэг онцлог бол улс орныг удирдах үзэл баримтлалыг тодорхойлох явдал юм. Ши Жиньпиний шинэ эриний Хятадын онцлогтой социалист үзэл баримтлалыг Үндсэн хуульд нэмэлт өөрчлөлт оруулах төслийн хувиар улс орны үндсэн хуульд бичиж оруулсан нь улс орны удирдах үзэл баримтлалыг цаг үетэй зэрэг урагшлуулахыг биелүүлсэн байна гэжээ.
Үндсэн хуульд өөрчлөлт оруулсан төсөлд, БНХАУ-ын дарга, дэд дарга дээд тал нь хоёр дараалж үүрэг гүйцэтгэнэ” гэсэн заалтыг хүчингүй болгосон тухай Шэнь Чүньяо хэлэхдээ: Энэхүү өөрчлөлт нь Хятадын төрийн удирдагчийн тогтолцоог боловсронгуй болгоход ашигтай, мөн нам болон улс орны урт хугацааны амар амгалан байдалд ашигтай гэжээ. Тэрээр хэлэхдээ: ХКН-ын Төв хорооны хамгийн дээд удирдах албан тушаал, Цэргийн төв зөвлөлийн дарга болон БНХАУ-ын даргыг хослуулсан удирдах тогтолцоо болон удирдах хэлбэр нь манай орон шиг ийм том нам, том орны хувьд зайлшгүй шаардлагатай бөгөөд хамгийн зохистой юм. Энэ нь үндсэн хуульд нэмэлт өөрчлөлт оруулах төслийн үндсэн хуулийн 79-р заалтын 3-р зүйлд хийсэн засвар болох юм. Улс орны удирдлагын тогтолцоог боловсронгуй болгож байгаа чухал арга юм. Иймэрхүү өөрчлөлт нь нөхөр Ши Жиньпинээр төв болгосон Намын төв хорооны нэр хүнд, төвлөрөн нэгдсэн удирдлагыг хамгаалахад ашигтай юм. Улс орны удирдлагын тогтолцоог боловсронгуй болгоход ашигтай юм. Нам болон улс орны урт хугацааны амар амгалан байдалд ашигтай юм гэжээ.

Анхаарууштай нь үндсэн хуульд нэмэлт өөрчлөлт оруулсан төсөлд нийт 21 заалттай, Үүний 11 заалт нь Хянан шалгах хороонтой холбоотой. БХАТИХ-ын Байнгын хорооны хууль зүйн ажлын хорооны орлогч дарга Жэн Шүна хэлэхдээ: Холбогдох нэмэлт өөрчлөлтүүд нь Хятадын хянан шалгах тогтолцооны өөрчлөлтийг гүнзгийрүүлэх хамгийн дээд төлөвлөгөө болох юм. Энэ нь Хятадын авилгын эсрэг ажлыг гүнзгийрүүлэхэд тустай юм гэжээ.
"Хянан шалгах тогтолцооны өөрчлөлтийг гүнзгийрүүлэх зорилго бол авилгын эсрэг нөөц хүчнийг нэгтгэж, авилгатай тэмцэх үйл ажиллагаанд намын нэгдсэн удирдлагыг бэхжүүлж, төвлөрсөн бөгөөд нэгдсэн, нэр хүндтэй, үр ашигтай үндэсний хянан шалгах тогтолцоог байгуулах болно. Үүнд нэгэн чухал үүрэг бий, энэ нь даруй хянан шалгах хороо байгуулах явдал юм. Энэ удаагийн үндсэн хуулийн нэмэлт өөрчлөлт оруулах төсөлд, хянан шалгах хорооны тухай тогтоол гаргасан явдал нь хянан шалгах хороо байгуулахын төлөө юм.

Дээрх өөрчлөлтүүдээс гадна, "Хятадыг баян хүчирхэг, цэцэглэн хөгжсөн, ардчилсан, соёл боловсонтой, эв зохицолтой, үзэсгэлэнт сайхан социалист орчин үеийн улс болгон хөгжүүлэх”, "Хятадын үндэстнүүдийн агуу их сэргэн мандалтыг биелүүлэх”, "Хятадын коммунист намын удирдлага бол Хятадын онцлогтой социализмын хамгийн үндсэн онцлог ”, "Хятад улс энх тайвнаар хөгжих замыг баримталж, харилцан ашигтай хамтдаа ашиг олох нээлттэй стратегийг баримтлах ”, төрийн албан хаагч албан ажилд орохдоо үндсэн хуульд тангараг өргөх зэргийг үндсэн хуулийн холбогдох заалтад бичиж оруулсан юм.

ХОУР

Ч.Ганзориг: Жаст группын ерөнхий захирал Ш.Батхүү олон баримтыг, түүний дотор миний гарын үсгийг хуурамчаар үйлдсэн

tonshuul — Mon, 12 Mar 2018 08:42:50 +0800

Эрдэнэт үйлдвэрийн Ерөнхий захирлаар 2007-2013 онд ажиллаж байсан Чимиддоржийн Ганзориг миний бие сүүлийн өдрүүдэд манай бүхий л хэвлэл мэдээллийн хэрэгслээр гарч байгаа ноцтой асуудлаар өөрийн байр суурийг илэрхийлж, Монголынхоо олон нийтэд хандаж байна.

Жаст групп, Стандарт банкны хооронд хийгдсэн зээлийн баталгааг Эрдэнэт үйлдвэр гаргасан гэх асуудлаар хууль, хяналтын байгууллага 2013 оноос шалгаж байгаа бөгөөд одоо ч үргэлжилсээр байгаа. Миний хувьд дэлхийн хэмжээний топ үйлдвэр Эрдэнэтийг удирдаж байсны хувьд хүссэн хүсээгүй энэ асуудалд ороогдон холбогдох байгууллагуудад өөрийн мэдэх зүйлээ хэлж тайлбарласаар өнөөг хүрлээ.

Улс орныхоо болон Эрдэнэтийн 6000 хүнтэй том хамт олны өмнө өндөр хариуцлага хүлээсэн албан тушаал хашиж байсан хүний хувьд хэдэн жилийн турш ужгирч, сүүлийн үед улс төрийн өнгө аясыг илэрхий олж байгаа Эрдэнэтийн гэх баталгааны асуудал үнэн мөнөөрөө шийдэгдэнэ гэдэгт итгэлтэй байдаг. Тийм ч учир өнөөг хүртэл хууль хяналтын байгууллагуудын хийж байгаа шалгалтад нөлөөлчих вий гэх болгоомжлолын улмаас хэвлэл, мэдээллийн байгууллагад хандаж байгаагүй. Олон нийтэд ч аливаа нэг тайлбар сэлт хийж байгаагүй.

Энэ удаа олон нийтэд хандахаас аргагүй болгож буй гол зүйл бол Монгол Улсын Засгийн газар Лондонгийн Арбитрын шүүхийн шийдвэрийг харгалзан Эрдэнэт үйлдвэрт Өмнөд Африкийн Стандарт банктай арбитрын тогтоосон төлбөрийн дүнг багасгах, өдөр, өдрөөр тооцогдож байгаа хүүг зогсоох үүднээс яриа хэлцэл хийх зөвшөөрөл өгсөнтэй холбоотой.

Хэдийгээр асуудал амаргүй байгаа, хараат бус Арбитрын шүүхийн шийдвэр гарсан нь үнэн ч Монголын шүүхэд одоог хүртэл албан ёсоор хүргүүлээгүй байгаа энэхүү шийдвэртэй холбоотой аливаа яриа хэлцлийг Монголын тал яаран хийх шаардлагагүй гэж үзэж байна. Учир нь олон улсын конвенцоор өөрт олгогдсон эрхээсээ сайн дураараа татгалзаж байгаа хэрэг болно.

Үүнийг би цэвэр улс орны эрх ашиг, нөгөөтэйгүүр цөөнгүй жил удирдаж жаргал, зовлонгоо хуваалцсан Уулын баяжуулах Эрдэнэт үйлдвэрийн хамт олны ашиг сонирхлын үүднээс анхааруулж байна.

Шалгагдаж, элдэв байдлаар хэлэгдэж байгаа миний хувьд гэм буруугүй болох нь хэзээ нэгэнтээ тогтоогдох байхаа. Надад өөрийнхөө гэм буруугүйг нотлох баримтууд хангалттай бий. Тэдгээрийг хууль хяналтын байгууллагуудад гаргаж өгч байгаа.

Түүнчлэн Монгол Улсын Үндэсний Аюулгүй байдлын зөвлөлийн гишүүдэд хандаж ээдрээ төвөгтэй энэ асуудалтай холбоотой зарим баримтуудыг тодорхой саналын хамт хүргүүлээд байна.

Одоогоор олон нийтэд нээлттэй байдлаар дараахь зүйлийг хэлье. Эцсийн дүндээ Жаст группын ерөнхий захирал Ш.Батхүү олон баримтыг, түүний дотор миний гарын үсгийг хуурамчаар үйлдсэн гэдэг нь Монголын шүүхээр тогтоогдоно гэдэгт би эргэлздэггүй. Хувь хүний асуудал яах вэ, хэзээ нэгэнтээ учир нь олдох биз. Харин олон улсын шинжээчид, шүүх шинжилгээний байгууллагаар хуурамч болох нь тогтоогдсон, баримт бичиг, хуурамч баталгаанаас болж Эрдэнэт үйлдвэр олон сая долларын төлбөрт унах ёсгүй гэж ямар ч гэрээнд гарын үсэг зураагүй албан тушаалтны хувьд би үзэж байна. Миний бие Стандарт банкны хүмүүстэй гэрээ хэлэлцээр хийх нь байтугай нэг ч удаа уулзаж байгаагүй болно.

Хэрэв асуудлыг улс төржүүлэлгүй, ажил хариуцсан эрх бүхий байгууллагууд Монгол Улсын нэгдэн орсон "Гадаадын арбитрын шийдвэрийг хүлээн зөвшөөрөх, биелүүлэх тухай” конвенцийн дагуу Жаст групп, Стандарт банкны хооронд хийгдсэн зээлийн гэрээнд Эрдэнэт үйлдвэрийн гаргасан гэх баталгааны асуудлаар манай тал өөрийн байр суурийг нотлох баримтуудын хамт үндэслэлтэй тайлбарлаж чадвал арбитрын шийдвэрийг биелүүлэхээс татгалзах хүртэл эрхтэй юм билээ. Энэ талаар ч холбогдох саналаа Монгол Улсын Ерөнхийлөгч, Улсын Их Хурлын дарга, Ерөнхий сайд нарт бичгээр хүргүүлсэн.

Энэ далимд саяхан Улсын Их Хурлын зарим гишүүдийн асуулгад Засгийн газар хариу өгөхдөө Стандарт банкнаас 213 сая ам.долларын зээл Эрдэнэт үйлдвэрийн дансанд орсон мэтээр дурдсан нь ташаа бөгөөд тэдгээр шилжүүлэг нь Жасттай холбоотой зээл биш зэсийн борлуулалтын орлого байсан гэдгийг залруулъя. Энгийн логикоор бодоход ч аль ч банк батлан даалт гаргасан этгээдийн дансанд зээлийг шилжүүлдэггүй нь тодорхой.

Ч.Ганзориг

http://www.sonin.mn/news/Politics-fb-bot/88511

ХҮҮХДЭЭ ХӨХҮҮЛЭХДЭЭ ГАР УТСАА ХОЛ БАЙЛГААРАЙ

tonshuul — Mon, 12 Mar 2018 08:24:52 +0800

Эх хүнээс өөр хэнд ч заяадаггүй хүүхдээ хөхүүлэх тэр агшин бол жинхэнэ ид шидийн үе. Учир нь хүүхдээ хөхүүлэх агшинд эхийн өнчин тархинд үүсдэг окситоцин хэмээх даавар эхэд хүүхдээ хайрлан энхрийлэх, асран хамгаалах хязгааргүй хүнлэг энэрэнгүй зан төрхийг бий болгодог. Энэ үед эхийн сүү аяндаа хүүхдээ цадахуйц хэмжээгээр боловсорч гадагшилна.

Эх хүн хүүхдээ хөхүүлэхийн өмнө өхөөрдөж эрхлүүлэн, хөхүүлэх үедээ гол анхаарлаа бяцхан үрдээ хандуулж, эелдэг зөөлөн ярьж өөрийг нь анхаарч байгааг мэдрүүлж хөхүүлэхэд хүүхэд хөхөө хөхсөн болдог.

Хүүхдээ хөхүүлж байгаа эх хүн хүүхдээ энхрийлэн хайрлаж, хүүхдийнхээ нүд рүү харан ярилцах нь хүүхдээ хөхүүлэх хамгийн нандин зүйл юм. Учир нь энэхүү харц хүүхдэд амар тайван, аюулгүй байгааг нь мэдрүүлэх түүнчлэн эхийн сүүний гарц сайн байхын түлхүүр билээ.

Таван жилийн өмнө эхчүүд хүүхдээ хөхүүлж байх үедээ хүнтэй юм ярих, өөр зүйл давхар хийх, телевиз болон ном сэтгүүл үзэх, утсаар ярих нь эхээс үрдээ харцаараа мэдрүүлэх хайр болон сүүний гарцыг багасгадаг тул эдгээрээс зайлсхий гэж зөвлөдөг байсан.

Харин өнөөдөр ухаалаг утас хэмээх хаана ч гэсэн бариад явдаг, эхийн харцыг бяцхан үрээс нь булаасан энэ зүйл хэзээнээ газар авчээ.

АНУ-ийн Калифорни мужийн эрүүл мэндийн төвийн эхчүүдийн сэтгэцийн чиглэлээр дагнан ажилдаг сэтгэлзүйч Доктор Катин Кайниги хэлэхдээ "Эхчүүд хүүхдээ хөхүүлж байхдаа ихэвчлэн цахим мэдээллүүдийг уншиж, төрөл бүхийн мэдээллийг аван, харилцан санал бодлоо хуваалцаж цагийг идэвхтэй өнгөрөөж байна. Гэтэл эхийн харц хаана байна вэ?, хүүхдээ даваад дэлгэц ширтэж байна. Энэ нь хүүхдэд сөрөг нөлөөтэй” гэж бичжээ.

Иймээс та бүхэн дараах энгийн зөвлөгөөг анхаарч, хэвшүүлээрэй!

Нэг гартаа хүүхдээ тэврээд, нөгөө гартаа утсаа барих байрлал бол аюултай. Хүүхэд хөхүүлэх үеийн байрлалаас сүүний гарц шалтгаална. Хүүхдийг тэврэхдээ толгой, биеийг нь нэг түвшинд, ээж хөхүүлэх талын гарын шуундаа хүүхдийнхээ толгой, хүзүү, бүх биеийг тулж тэвэрнэ;
Хүүхдээ хөхүүлж байх үедээ гар утсаа анхаарч харах нь аюултай байрлал. Хүүхэд хөхөндөө ойртсон хамар нь хөхний толгойн харалдаа, нүд нь хөхрүүгээ болон ээжрүүгээ харж байх. Мөн ээж нь хүүхдээ зөв хөхөж байгааг нь хүүхдийн доод уруул гадагшаа цорвойсон, эрүү хөхөнд шүргэсэн, завсаргүйгээр удаан, хүчтэй хөхөж байгаа зэргийг нь ажиглан мэднэ. Иймд ээжийн харц өөр зүйлд анхаарах ёсгүй;
Ээж та хүүхдээ хөхүүлж байх үедээ ухаалаг утсаа биеэсээ хол байлгаж, бүх анхаарлаа үрдээ зориулаарай.

Эх сурвалж: НЭМҮТ

О.Баасанхүү: "Эрдэнэт" ийн 51 хувийн өрийг буруутай этгээдүүдээр төлүүлэх ёстой

tonshuul — Mon, 12 Mar 2018 08:13:09 +0800

Улаанбаатар /МОНЦАМЭ/. УИХ-ын гишүүн О.Баасанхүү Үндсэн хуулийн цэцийн тухай хуулийн 5 дугаар зүйлийн 1 дүгээр заалтыг хүчингүй болгуулахаар Үндсэн хуулийн цэцэд хандах болон "Эрдэнэт"-ийн 51 хувийн асуудлаар мэдээлэл хийлээ.

Тэрбээр мэдээллийнхээ эхэнд, Үндсэн хуулийн цэц их суудлын хуралдаанаар саяхан "УИХ-ын гишүүн гэмт хэргийн газарт нотлох баримттайгаар баригдахаас бусад тохиолдолд эрхийг нь түдгэлзүүлж болохгүй” гэсэн заалтыг хүчингүй болгосон нь зөв шийдвэр болсон хэмээв. Гэвч Цэц 2015 оны арванхоёрдугаар сарын 4-нд "Цэцийн гишүүнийг цэцийн зөвшөөрөлгүйгээр /түүнийг гэмт хэрэг үйлдэж байхад нь буюу хэргийн газраас нотлох баримттайгаар баривчилснаас бусад тохиолдолд баривчлах, албадан хорих буюу цагдан хорих, эрүүгийн яллагдагчаар татах, мөн орон байр, албан байранд нь үзлэг нэгжлэг хийх, бичиг баримт эд зүйлийг хураан авахыг хориглоно/ бүрэн эрхийг нь түдгэлзүүлж болохгүй" гэсэн заалт Үндсэн хуулийн цэцийн тухай хуулийн 5 дугаар зүйлийн 1-р заалтад оруулсан нь Үндсэн хууль зөрчсөн гэж тэрбээр үзэж байгаа юм байна. Иймээс энэ заалтыг хүчингүй болгуулахаар УИХ-ын гишүүнийхээ бүрэн эрхийн хүрээнд Үндсэн хуулийн цэцэд хандана гэдгийг О.Баасанхүү гишүүн мэдэгдэв.

УИХ-ын гишүүний бүрэн эрхийн хүрээнд, эсвэл иргэний хүрээнд хандах ялгаатай учир УИХ-ын гишүүний хувиар хандаж, Хууль зүйн байнгын хорооны хуралдаанаар хэлэлцүүлэн, УИХ-аас тогтоол гаргуулахаар төлөвлөж буй аж. Хэрэв УИХ-аас энэ заалт нь Үндсэн хууль зөрчсөн байна гэдэг тогтоол гаргавал түүнийг нь Цэц заавал хурал хийж хэлэлцэх үүрэгтэй байдаг.

Түүнчлэн "Эрдэнэт” үйлдвэрийн 49, 51 хувьтай холбоотой асуудал яригдаж байгаа энэ үед ирэх даваа гарагт тэрбээр Эрдэнэтийн иргэдтэй уулзахаар төлөвлөснөө дуулгав. Тэрбээр "2013 оны зургадугаар сарын 19-нд "Жаст” группээс тухайн үеийн "Эрдэнэт”-ийн захирал Ц.Даваацэрэнд тодорхойлолт хүргүүлж байжээ. "Д.Сугар, н.Мөнхжаргал, Ч.Ганзориг нарын гарын үсгийг хуурамчаар үйлдэв гэдгийг тодорхойлов.

Энэ мөнгийг манай компани төлнө" гэсэн утгатай. Хэн нэгний гарын үсгийг байтугай айлын хашаанаас нүүрс хулгайлсан хүн тодорхойлолт бичээд сууж байвал ямар харагдах вэ?

Мөн Үндсэн хуулийн цэцийн гишүүн Д.Сугартай нэр холбогдсон хэргүүд өмнө нь яригдаж, хэвлэлүүд бичиж байжээ. Тухайлбал, 2013 онд Д.Сугарыг МИАТ-тай холбоотой хэргээр шалгах шаардлага байна гээд Улсын мөрдөн байцаах газраас нийслэлийн Прокурорт хандаж байсан ч Цэцээс эрхийг нь хязгаарлах боломжгүй гээд хамгаалсан. Мөн ХОМ нь зөрчилтэй байхад цалингийн 30 хувиар торгоод өнгөрүүлж байж. Д.Сугар цагтаа зөвхөн Төрийн өмчийн хорооны дарга байгаад зогсоогүй маш олон төрийн өмчит компанийн ТУЗ-ийн даргаар ажилладаг байсан. Тэгэхээр ТӨК-иудын асуудлыг нь мэдэж байх ёстой хүний нэг. Ийм учраас Ш.Батхүүгийн "Эрдэнэт”-ээр баталгаа гаргуулж, Стандарт банкнаас 109 сая ам.долларын зээл авсан гэх хэрэгтэй холбогдуулж Д.Сугарыг шалгах шаардлагатай гэж үзэж байна” гэлээ.

Дараа нь сэтгүүлчдийн асуултад хариулт өгөв.

-Хоёр долоо хоногийн өмнө та "Д.Сугарын гарын үсэг мөн болохыг тогтоосон” гэж мэдээлэл хийж байсан. Одоо болохоор хуурамч байсан гэлээ. Алинд нь итгэх юм бэ?

-Гарын үсэг хуурамч үү, жинхэнэ үү гэдэг чухал биш. Би ч тэр гарын үсгийг хуурамч биш эсэхийг нь тогтоодог юм биш. Ш.Батхүү 2013 онд "Ч.Ганзориг, Д.Сугарын нарын гарын үсэг хуурамч болохыг нь тодорхойллоо” гэсэн бичгийг хүргүүлсэн байдаг. Асуудлын гол нь Монгол Улс өнөөдөр 109 сая ам.долларын өрөнд орчихоод байна. Дээр нь Төрийн банкинд өртэй. Д.Сугар тухайн үед "Эрдэнэт” үйлдвэрийн ТУЗ-ийн дарга байсан хэрнээ яагаад энэ мөнгийг төлөх үйл ажиллагаанд хяналт тавиагүй ажилласан юм бэ. Олон улсын Арбитрын шүүхийн шийдвэрээр гарын үсэг нь хуурамч биш гээд шийдвэрээ гаргасан, биднийг өртэй болгочихоод байна.

Жирийн нэг жолооч бусдыг шүргэхэд хариуцлага хүлээдэг. Гэтэл Монголыг 300 орчим тэрбум төгрөгийн өрөнд оруулчихаад байгаа хүн яагаад "Би 461-рүү чинь алхахад асуудалгүй” гээд сууж байдаг юм бэ. Ийм учраас тухайн үеийн Ерөнхийлөгчөөс эхлээд бүх албан тушаалтнуудыг шалгаж, үнэн худлыг нь тогтоох хэрэгтэй. Хууль хяналтын байгууллагаас эхлээд цэвэрлэх ёстой. Буруутай этгээдүүдээр өрийг нь төлүүлэх ёстой болохоос ард түмэн төлөх ёсгүй.

-"Жаст"-ын Ш.Батхүүгийн хөрөнгийг тухайн үед хурааж байсан. Энэ хөрөнгө хайчсан юм бол?

-Дахиад нэг зүйл хэлэхэд "Жаст"-ын Ш.Батхүүгийн хөрөнгийг хэн ч, хэзээ ч хураагаагүй. Хүний хөрөнгийг шүүхийн шийдвэрээр хураадаг. Гэм буруутай нь тогтоогдоогүй учир компанийг нь татан буулгаагүй. Тиймээс хаашаа хэн рүү шилжүүлж явах нь өөрийн асуудал. Хөрөнгө хураасан асуудал огт байхгүй учир тэр аж ахуйн нэгж, компаниуд нь хаана явааг шалгаж тогтоох ёстой.

Н.Туяа

Гэрэл зургийг Т.Чимгээ

Эх сурвалж: Монцамэ агентлаг

Монгол туургатны уран бүтээлчид туршлага солилцов

tonshuul — Mon, 12 Mar 2018 08:10:33 +0800

Улаанбаатар /МОНЦАМЭ/. Занабазарын нэрэмжит Дүрслэх урлагийн музейд "Монгол туургатны утга зохиол, урлаг анатологи” үзэсгэлэнг гаргав.

Монгол туургатныг урлаг уран бүтээлийг нийтэд дэлгэх, харилцан туршлага солилцох зорилготой уг үзэсгэлэнг "Спэйс энтэртаймент”-ын хамт олон энэ жил анх удаа зохион байгуулж буй юм. Үзэсгэлэнд Монгол, Тува, Өвөрмонгол, Халимаг, Буриадын уран бүтээлчид бүтээлээрээ оролцож харилцан туршлага солилцож байна.

Өвөрмонголын зохиолчдын эвлэлийн тэргүүлэгч Төвдалайн Энххад: "Монгол туургатны уран бүтээлчид харилцан туршлага солилцох, хамтран уран бүтээл туурвих, Монгол туургатны уран зохиолыг дэлхий нийтэд хүргэхэд түлхэц болохуйц уулзалт болж байна. Өвөрмонголоос цөөн тооны уран бүтээлчид ирсэн ч цаашдаа эл үзэсгэлэн, уулзалтыг жил бүр уламжлал болговол оролцогсдын тоо нэмэгдэх нь гарцаагүй. Өнөөдрийн уулзалт үзэсгэлэн нь Монгол, Өвөр Монгол, Тува, Халимаг, Буриадын уран бүтээлчдийг нэгтгэх, хамтын ажиллагааг өрнүүлэх боломжийг нээж буйгаараа онцлогой” гэв.

Энэ удаагийн уулзалт үзэсгэлэнд сонгодог урлагаас бусад бүх төрлийн уран бүтээлчдийг хамруулахаар зорьсон байна. Гэвч утга зохиол, яруу найраг, уран зураг, гар урлалын чиглэлийн хүмүүс түлхүү оролцож байгаа аж.

О.Мөнхжаргал

Эх сурвалж: Монцамэ агентлаг

Архидалт

tonshuul — Mon, 12 Mar 2018 08:03:37 +0800

Их л хэцүү санагдаж, шаналж байсан асуудлууд архи ууж мансуурсны дараа "Ѳѳ үхсэн яадаг юм бэ? Бүгдээрээ л адилхан юм байна шүү дээ" гэсэн тайвшрал руу хѳтѳлнѳ. Хүн болгон зовлонгоо ярьж, сонссон хүн бүр "Чи тэгэх хэрэгтэй, ингэх ёстой. Тэгж болохгүй, ингэж ч болохгүй. Амьдрал гэдэг чинь ийм байдаг юм" хэмээн цэцэрхсэн мансууралдаа улам улмаар согтоцгоож, ухаан санаа нь элий балай болж даамжрах үедээ хэн нэгэн рүү агсамнаж эхэлдэг. Хэт ухаантайдаа хэн нэгэнд дургүйцээд байгаа юм биш, дотоод сэтгэлд шатсан хорслоо зүгээр л хэн нэгэн рүү цацалж асгах гэсэн тэчьяадлаас тэгж агсардаг аж. За тэгээд л хэн ярьж, хэн уйлж, хэн гомдоллож байгааг ялгаж үл чадах хоромдоо нүд нь сүүмийж, тархи нь мансуурч, ухаан мэдрэл нь тасарч, нэг л мэдэх дор хар ангал нүх рүү нисэн унаж байгаа мэт мэдрэмжийн дараа юуг үл санах...

Монголчууд бид дунд сургуульдаа "Зүгээр суу" гэсэн багшийн командын дор зүгээр суусаар байгаад дотоод сэтгэлээ илчилж, бусдад ойлгогдохоор ярьж сураагүй. Уг нь хүмүүст санаа бодлоо ойлгуулж яримаар байдаг, даанч ярьж сураагүй. Түүндээ ичингүйрч хүлэгдсэн сэтгэл, жаахан уусны дараа садран асгарч гарна даа. Түүндээ урамшсан халамцуу хүмүүс зүгээр л зѳнгѳѳрѳѳ яриад яриад байна. Сэтгэл доторх буглаагаа задалж асгах гэж уух шалтгаан нь "Сайхан сэтгэлээ нээж ярьж сууя" гэдэг уриалга юм шүү дээ. Тэр ч бүү хэл манай улстѳрчдийн ажил хэрэг ярихдаа заавал архи задалж халамцаж байдаг нь бас үүнтэй холбоотой. Би заримдаа, энэ монгол хэлний хичээлд тэр их дүрмүүдийг ойлгуулах гэж "тамалж" байхын оронд, санаа бодлоо бусдад ойлгуулж яриулж сургах нь хожим архидах шалтгааныг багасгаж болох ч юм болов уу? хэмээн аргаа баран боддог юм. Ядаж эрүүлдээ санаа бодлоо сайтар илэрхийлж сургавал, эрүүл сэтгэлгээ давамгайлна даа.

Баяр болгоноор зохион байгуулалттайгаар архидацгааж, нэг нь архиар дайлсан бол нѳгѳѳх нь заавал хариу барих "ээлжтэй байх ёстой" гэдэг сэтгэлгээ нь монголчүүд бидний үндэстний бахархал болох янзтай. Ядуу хэцүү байгаагаа гайхаж гомдоллох атлаа баяр болгоноор яаж ийгээд л тансаглаж, согтож шогтсон үйлдэл бүхнээ "Бидний амьдрал ядуу, бас хэцүү байгаагаас..." хэмээн зѳвтгѳдѳг нь монголчууд бидний муухай араншин. "Архи уухгүй бол дотно найзгүй болно" гэдэг философи ч бидний үндсэн дүрэм болох бололтой. "Хундаганы үг хэлэхгүй бол архидалт, хундаганы үг хэлбэл арга хэмжээ" хэмээх социализмын үеийн хошигнолоор бидний амьдралын бэлэгдэл хундаганы үгийн хэллэгээр хэмжигдэх болох нээ. Яг эрүүлээр харах юм бол бидний архидалт хэр хэмжээнээсээ хальж байнаа. Мэдээж бүх хүнийг хамраагүй боловч, дийлэнх олонхийг хамарч байна.

"Цэргийн баяр"-аас ѳмнѳ муу ёрын юм бичлээ хэмээн уурсах гэж байгааг тань ойлгож байнаа. Янз янзаар ойлгох гэвч, зѳвтгѳх шалтгаан тун бага байна. Бид хэдийчинээн ууж мансуурах тусам, бидний сэтгэл тэгж л хѳлчүү байж, бидний амьдрал улам л дорд муухай харагдаж, бидний найз нѳхѳд үнэ цэнэгүй болсоор байх болно. Чи ч бас үнэ цэнэгүй болж эхэлдэг. Халамцуугаар харсан нүд сѳлѳр байж, халамцуугаар ярьсан яриа бүхэн худлаа болж, архины найзууд хуурамч санагдаж, амьдрал тэр чигтээ утгагүй бодогдож эхэлбэл яана. Монголчууд бид ингэж амьдарсаар л байх уу?

Харнууд овгийн Гомбосүрэнгийн Галбадрах

ГҮЙЛТИЙН ЦАНЫН СПОРТЫН 2018 ОНЫ УЛСЫН АВАРГУУД ТОДОРЛОО

tonshuul — Mon, 12 Mar 2018 07:41:38 +0800

Улаанбаатар /МОНЦАМЭ/.Гүйлтийн цанын насанд хүрэгчдийнМонголУлсын аварга шалгаруулах тэмцээнэнэсарын 8-11-нд Төв аймгийн Жаргалант сумандболж шилгүүдээ тодрууллаа.

Тэмцээнийг Монголын цанын холбоо болон Жаргалант сум хамтран зохион байгуулж"Хилчин”, "Алдар” спорт хороо, Төв, Хэнтий, Дархан, Хөвсгөл, Дорнод зэрэг 12 байгууллагын 100 гаруй цаначидхурд, хүчээ соринөрсөлдлөө. "Пёнчан 2018” өвлийн XXIII олимпийн наадамд оролцсон Б.Ачбадрах, Ч.Отгонцэцэг болон үндэсний шигшээ багийн шилдэг тамирчид оролцож,угтэмцээнийгтунөрсөлдөөнтэй болгосон төдийгүйзалуу тамирчдадур чадвараа харуулж, төрөл бүрд ширүүн өрсөлдөөнийг үзүүлсэн байна.

УАШТ-ий дүнг танилцуулахад:Эрэгтэй 10км (тэших техник)1-р байр Б.Ачбадрах ("Хилчин” спорт хороо),2-р байр С.Дүүрэнбаяр ("Алдар” спорт хороо),3-р байр О.Гантулга ("Алдар” спорт хороо)

Эмэгтэй 5 км-т:1-р байр Э.Ариунтунгалаг ("Алдар” спорт хороо),2-р байр А.Энхтуул ("Алдар” спор хороо),3-р байр Э.Ариунзул (Хэнтий аймаг)

Эмэгтэй спринт зайн уралдаанд:1-р байр А.Энхтуул,2-р байр Д.Оюунчимэг,3-р байр Э.Ариунтунгалаг

Эрэгтэй спринт зайн уралдаанд:1-р байр С.Дүүрэнбаяр,2-р байр Б.Ачбадрах, 3-р байр О.Гантулга

Эмэгтэй 10км-т:(сонгомол техник, бөөн гараа)1-р байранд ОУХМ А.Энхтуул,2-р байранд СМ Д.Оюунчимэг,3-р байранд ОУХМ Э.Ариунтунгалаг

Эрэгтэй 15км-т:(сонгомол техник, бөөн гараа)1-р байранд ОУХМ С.Дүүрэнбаяр,2-р байранд ОУХМ Б.Ачбадрах,3-р байранд ОУХМ О.Гантулга нартус тус шалгарлаа.

Д.Өлзий

Хятад улс санаатайгаар худалдааны дайн үүсгэхгүй

tonshuul — Mon, 12 Mar 2018 07:38:21 +0800

Сүүлийн үед, Хятад, Америкийн эдийн засаг, худалдааны харилцаанд саад бэрхшээл тулгарсаар байна. Хятад, Америк худалдааны дайн үүсэх эсэх талаар дэлхий нийт анхаарал хандуулж байна. Үүнд холбогдуулан 11-д Бээжин хотноо Хятадын Худалдааны яамны сайд Жүншань: Хятад улс худалдааны дайн хийхийг хүсэхгүй, санаатайгаар худалдааны дайн үүсгэхгүй. Гэвч аливаа өрсөлдөөн сорилттой тулахад бэлэн байна. Хятад, Америкийн бүх талын эдийн засгийн яриа хэлэлцээ тасалдаагүй хэмээн онцолжээ.

Ойрын 40 жилийн турш, Хятад, Америкийн худалдааны цар хэмжээ 232 дахин нэмэгдэж, хоёр орны хоёр талт хөрөнгө оруулалтын хэмжээ 230 гаруй тэрбум ам.доллар хүрсэн байна. Энэ нь хоёр орны эдийн засгийн харилцан нөхөвөрлөх чанар улам уялдаатай, хамтын ажиллагааны нөөц хүчин асар их байгааг харуулж байна гэж Жүншань үзэж байна.

Худалдааны тэнцвэрийн асуудлаар Жүншань: Хятад, Америкт статистикийн талаар зарим ялгаа зөрөө бий. Өнгөрсөн онд хоёр орны статистикийн ажлын хэсгийн тооцоолсны үр дүнд, хоёр орны худалдааны зөрөөг Америк 20 орчим хувь өндрөөр төсөөлсөн гэжээ.

Ренчинсоо

ХОУР