Шилдэг залуус - ErdenetMedee.mn

Тэр “бөх” хэний хэн бэ?

khulan — Mon, 23 Aug 2021 15:24:46 +0800

Төсөрхөн Хүй долоо худагт 512 бөхийн нүсэр барилдаан болж, ковид гарсаар хоёр жил гаруй наадмаа санаж байсан хүмүүсийн магнайг тэнийлгэсэн. Хэдийгээр үзэгчгүй боловч удаан бөх үзээгүй бөхийн хорхойтнууд хоёр өдөр телевизийнхээ өмнө уягдаж, бөхийн барилдаан хөөрхөн сенсаци дэгдээгээд амжсан. Улсын баяр наадмаа ч аргагүй эрхэнд хойшлуулан цахимаар хийгээд байхад Монголын Залуучуудын Холбоо 100 жилийнхээ ойд зориулсан "хоншоор”-тойгоор хийжээ.

Гэтэл мөн л өнгөрсөн амралтын өдрүүдэд 700 гаруй харваач оролцсон сурын наадам мөн л Хүй долоо худагт болов. Мөн л наадмыг Монголын Залуучуудын Холбооны 100 жилийн ойд зориулсан бөгөөд холбооны Ерөнхийлөгч жанжин малгай, хөх торгон дээлтэй сур харваж үзүүлэв.

Нөгөө найрын ширээний хойморт торгон дээлтэй ханхалзаад байдаг гэдэг шиг 512 бөхийн барилдааныг нээж үг хэлж байсан мөнөөх О.Гэрэлт-Од хэмээх залуу. Ийнхүү хоёр наадам дараалуулсан хийсэн Залуучуудын холбооны тэргүүн анхаарал татаж байна. Нэг хэсэг чимээ багатай байсан МЗХ-ны Ерөнхийлөгч солигдсоноос хойш хэний хэн, ямар "битүү морь” гэнэт гараад ирэв гэж гайхашрах болсон. Харин энэ удаад О.Гэрэлт-Од хэмээх залуу ковидын үед бөх барилдуулж, сур харвуулан, хоёр жил шахам тасраад байсан наадмыг сэргээж жинхэнэ утгаараа олны анхааралд өртөж чадав бололтой. Бөхөө санасан монголчууд баярлаад сүйд.Бас ч гэж "чадалтай” аавын хүүгийн хийдэг ажил гэж шэвэр авир хийж байна.

Жанжин малгай, торгон дээлтэй тэр "бөх” хэний хэн юм бол?

МЗХ тамирчдын төлөөлөлд шагнал гардууллаа

khulan — Sat, 24 Jul 2021 15:01:29 +0800

Дэлхийн спортын их наадам "Токио-2020” наадам нээлтээ хийсэн өдөр Монголын Залуучуудын Холбооны төлөөлөл Монголын баг тамирчдын төлөөлөлд амжилт хүсэн, шагнал гардууллаа.

Тус холбооны зүгээс Токиогийн наадамд Монгол Улсаа төлөөлөн оролцож буй хүндийн өргөлтийн тамирчин Мөнхжанцангийн Анхцэцэг, Эрдэнэбатын Билэгсайхан нарт "Тамирчны алдар”, дасгалжуулагч Цэнхэржавын Хосбаярт "Залуу үеийг халамжлан хүмүүжүүлэгч” шагналаар шагнасныг МЗХ-ны дэд ерөнхийлөгч А.Анхбат гардуулан өгч, нийт залуучуудынхаа өмнөөс амжилт хүслээ.

Дашрамд сануулахад, Азийн анхны Залуучуудын байгууллага байгуулагдсаны 100 жилийн ой энэ жил тохиож буй. МЗХ нь үе, үеийнхээ туршид Монголын хүүхэд, залуучуудыг хамарсан бүх нийтийн спортын олон арга хэмжээг зохион байгуулсаар ирсэн юм.

Токиогийн тэнгэрт Монгол Улсын Төрийн далбаа, олон, олноор мандаж, Монголын маань баг тамирчид амжилт бүтээл дүүрэн байх болтугай.

Онцгой байдлын дөрвөн албан хаагчид мөнгөн шагнал олголоо

mart — Thu, 02 Jan 2020 10:25:29 +0800

Аймгийн Засаг дарга буюу Онцгой комиссын дарга Д.Батлут ОБГ-ын алба хаагчидтай уулзаж 2019 онд хамт олноо манлайлан ажилласан дөрвөн албан хаагчийг тус бүр нэг сая төгрөгөөр шагналаа.

Мөн энэ онд аймгийн ЗДТГ-аас ОБГ-ын техник, тоног төхөөрөмжийг нэмэгдүүлэх, алба хаагчдын нийгмийн асуудлыг шийдвэрлэх зорилгоор 100 сая төгрөгийн хөрөнгө оруулалт хийжээ.

Энэ онд тус байгууллага гал, гамшиг ослын 87 дуудлага авч ажилласан байна.

Э.ЭНХЖИН: БОДЛОГЫНХОО ХАРИУГ ГАРГАХ ГОЁ

tonshuul — Fri, 01 Dec 2017 10:19:13 +0800

Энэ сарын 8-12-нд Филиппин Улсын Давао хотод болсон математикийн олон улсын "ITMO-International Teenagers Mathematics Olympiad" –д Монгол Улсаас найман сурагч оролцож багийн дүнгээрээ "Хүрэл” медаль хүртсэн юм. Хоёр жилд нэг удаа болдог уг олимпиадад хөдөө орон нутгаас анх удаа 6 сурагч оролцсоноос Орхон аймгаас Баян-Өндөр цогцолбор сургуулийн 5д ангийн сурагч Э.Энхжин оролцлоо. Тэрээр хувийн амжилтаараа мөн "Хүрэл” медаль хүртсэн юм.

-Монгол Улс, Орхон аймгийнхаа нэрийг олон улсад дуурсгасанд баяр хүргэе. Олон улсын тэмцээнд анх удаа оролцсон гэл үү ?

-Тиймээ. Анх удаа оролцсон. Монголдоо зохион байгуулагдсан олон тэмцээнд оролцож оноогоо цуглуулсан. Онооныхоо тоогоор энэ тэмцээнд оролцох эрхээ авсан.

-Орхон аймгаас сонгогдсонд ээж, аав болон багш, ангийн хамт олон чинь их баярласан байх даа.

-Аав, ээж, багш маань их баярласан. Сайн хичээгээрэй гэсэн. Би энэ зун Улаанбаатар хотод "Классик 2017” тэмцээнд оролцож сайн оноо авсан. Энэ тэмцээн нь 3 үе шаттай байдаг. Нийт 110 оноо авсан. 200 гаруй хүүхэд оролцож би 3 дугаар байранд орсон. Энэ нь Филиппинд болсон тэмцээнд оролцох эрхээ авахад нөлөөлсөн.

-Монголдоо ямар, ямар олимпиадад орж байв?

-П.Энхболдын нэрэмжит улсын олимпиадад 3 дугаар байр, Турк сургуулийн нэрэмжит "Эмпати”олимпиадад 1 дүгээр байранд орж байсан. Би математикийн олимпиадыг алгасахгүй орохыг хичээдэг.

-Филиппинд болсон математикийн олимпиадад Монголоос хэдэн хүүхэд оролцсон бэ?

-Улаанбаатар хотоос 2, Баянхонгор аймгаас хоёр, Дархан-Уул аймгаас нэг, Орхоноос нэг, Дорноговь аймгаас хоёр хүүхэд оролцсон. Нийт найман хүүхэд 4, 4-өөр хоёр багт хуваагдсан. Нэг баг 10 бодлого бодохоос наймыг нь 4 хүүхэдэд хувааж тус бүр 2 бодлого бодож үлдсэн 2 бодлогоо багаараа бодсон. Багийн дүнгээрээ "Хүрэл” медаль, хувийн амжилтаараа би бас "Хүрэл” медаль хүртсэн. Манай багт Баянхонгорын хоёр, Дархан-Уул аймгийн нэг хүүхэд байсан.

-Бодлого нь хэцүү байсан уу?

-Гайгүй.

-Өөрт чинь ноогдсон хоёр бодлогоо бүгдийг нь бодсон уу?

-Хоёр бодлогынхоо нэгийг нь бодсон.

-Багаараа ажилласан бодлого нь хүнд байсан уу?

-Математикийн агуулгатай бодлого байсан. Сайн бодож чадаагүй ээ.

-Филиппин улс ямар санагдсан бэ?

-Их гоё байсан. Надад далай нь таалагдсан.

-Ангийхандаа тоо зааж өгдөг үү ?

-Өгдөг. Сонирхолтой байдаг. Би том болоод математикийн багш болно.

-Ирэх жил оролцох уу?

-Оролцох бодолтой байгаа. Болгар улсад математикийн олимпиад долоодугаар сард болно. Тэнд одооноос бэлдэнэ.

-Эрдэнэтэд хотод М.Баасай багшийн нэрэмжит математикийн олимпиад болдог. Энэ тэмцээн Хангайн бүсийн хүүхдүүд оролцдог байх аа?

-Өнгөрсөн жил М.Баасай багшийн олимпиадаас нэгдүгээр байр эзэлсэн. Энэ тэмцээнд 200 гаруй хүүхэд оролцсон.

-Тоо бодох гоё уу?

-Гоё. Бодлогын хариуг нь гаргах гоё байдаг.

-Хариу нь гарахгүй бол яах вэ? Дараа бодож хариуг нь гаргая гээд хойш тавьж байсан бодлого байгаа юу?

-Байхгүй. Би заавал хариуг нь гаргадаг. Чадахгүй бол аав, ээж, багшаасаа асуудаг. Хариуг нь гаргаж байж дараагийн бодлогоо боддог.

-Чөлөөт цагаараа юу хийдэг вэ?

-Ном уншдаг. Одоо "Газар доогуур 20 мянган бээр аялсан” гэдэг номыг уншиж байгаа. Би жилд 10 гаруй ном уншдаг. Уран зохиолын номонд дуртай.

-Амжилт хүсье.

Д.Эрдэнэчимэг: Э.Энхжин чансаа тогтоох олимпиадаас эхний 10-т жагссан

Эрдэнэбатын Энхжингийн анги удирдсан багш Д.Эрдэнэчимэгтэй цөөн хором ярилцлаа. Тэрээр бага ангийн багшаар 31 жил ажиллаж байна.

-Багш хүн шавийхаа амжилтаар л бахархдаг. Э.Энхжингээрээ их бахархаж байгаа биз дээ?

- Тэгэлгүй яахав. Нэгдүгээр ангиасаа л манай ангид орж байсан. Шавийгаа олон улсын тэмцээнд ороод амжилт гаргасанд манай сургууль их баярлаж байгаа.

- Олон улсын тэмцээнд ороход оноо цуглуулдаг гэж байна. Ямар, ямар тэмцээнд орж хэдий хэмжээний оноо цуглуулах вэ?

-"Монголын математикийн багш нарын хороо”-оос чансаа тогтоох 10 олимпиадыг нэрлэдэг. Чансаа тогтоох олимпиадад орж хүүхдүүд оноогоо цуглуулдаг. Жишээ нь П.Энхболдын нэрэмжит улсын олимпиад нь хоёр жилд нэг удаа болдог. Монголд хамгийн "том” олимпиадын нэг юм. Мөн хувийн сургуулийн нэрэмжит олимпиадууд болно. Жил бүр чансаа тогтоох олимпиадийн нэрсийг "Монголын математикийн багш нарын хороо”-оос зарладаг.

- Э.Энхжин чансаа тогтоох олимпиаддаа бүгдэд нь орж ээ?

-Тэгсэн. Манай хүүхэд улсын чансаа тогтоох олимпиадаас эхний 10-т жагсаж байсан. Ер нь хоёрдугаар ангиасаа эхэлж тэмцээнд орсон. Хоёрдугаар ангийн хагас жилд программын түвшний мэдлэгээ эзэмшээд гуравдугаар ангийн хичээлээ бие дааж үзсэн. Одоо зургаадугаар ангийн хичээлээ үзэж байгаа. Өөрөө их оролдлоготой, нухацтай хүүхэд. Таваас дээш ангийн матемтикийн хичээлээ М.Баасай, н.Пүрэвсүрэн багшаар заалгадаг. Сая Филиппин явахаасаа өмнө Б.Батцэнгэл багшаар нэг сар гаруй хичээл заалгасан.

-Филиппинд болсон олимпиадад Монголоос ямар багш зохион байгуулж явсан бэ?

- Монголын математикийн олимпиадын хорооны гишүүн, доктор Б.Батцэнгэл багш ахалж явсан. Мөн Дархан-Уул аймгийн "Монгол Оюу” сургуулийн багш Х.Төмөрхан, Баянхонгор аймгийн "Алгоритм” сургалтын төвийн багш С.Цагаан нар багшаар ажилласан. Энэ удаагийн олон улсын математикийн олимпиадад анх удаа хөдөө орон нутгаас зургаан хүүхэд оролцсон. Өмнө нь дандаа Улаанбаатар хотын сурагчид оролцдог байсан. Б.Батцэнгэл багш хөдөө орон нутгаас хүүхдүүд оролцуулна гэж 6 хүүхдийг сонгосон. Үүнд маш их баярлаж байгаа.

-Э.Энхжингийн давуу тал юу вэ?

-Оролдлоготой, махруу. Нэг бодсон бодлогоо огт мартдаггүй. Сонссон, сурсан зүйлээ мартахгүй байх нь сурагч хүний хамгийн том давуу тал.

Тэнхлүүн яваа Тээвэр ложистикийнхон

saikhnaa — Tue, 28 Nov 2017 15:45:34 +0800

Эрдэнэт” үйлдвэрт 38 жил тус тусдаа үйл ажиллагаа эрхэлж байсан Төмөр замын цех, Материал техникийн хангамжийн бааз нэгдэн Тээвэр ложистикийн алба нэртэй болж өргөжсөнөөс нь хойш тухтай сурвалжлаагүй юм байна. Өвлийн хүйтэн "тачигнасан ” өдөр эднийхийг зорилоо. Зам засварын хэсгийнхэн төмөр замын ойр орчмын цас цэвэрлэгээндээ гарсан угтав.

Хуучнаар төмөр замын цехийн захиргааны байраар орвол шатны бариулаасаа эхлээд "гял цал”. Вагоны дотрыг санагдуулам бөмбөгөр тааз, нарийн хонгил нь "шил толь”. Интерьер засал нь эгээ уран зургийн галарей мэт. Материал техникийн хангамжийн баазынхантай ханаар тусгаарлан суудаг байснаа сэт цохиод нэгдчихэж. Харин тэр хавь засвар ороод ундуй сундуйхан.

Нэгдээд ойндоо хүрч буй уг цех ерөнхийдөө хоёр чиглэлээр үйл ажиллагаа явуулдаг. "Эрдэнэт” үйлдвэрийн эцсийн бүтээгдэхүүн зэсийн болон молибдений баяжмалыг илчит тэргэнд ачиж холын замд үддэг.

Ингэхдээ Улаанбаатар төмөр замын "Эрдэнэт” өртөө, Гаалийн газар, хяналтын байгууллагуудтай өдөр бүр, цаг тутам хамтран ажиллана. Баяжуулах үйлдвэрийн Шүүн хатаах хэсгээс гарч буй зэсийн баяжмал чанарын хяналтаар түрүүлж ордог юм байна. Тэд хэрхэн яаж ачих, ямар агуулгатайг тодорхойлсны дараа гадны байгууллагуудын хяналт үйлчилгээ тавигдана.

Төмөр замын хэсгийн ачаа бараа хүлээлцэгч нар гаалийнхантай хамт шалгаад вагонд ачна. Баяжмалын уут болгоныг хэмжиж шалгах жишээтэй. Уутанд гурван тонн баяжмал савладаг, нэг вагонд дунджаар 22-23 уут баяжмал орж харагдсан. Тэгэхээр 70 орчим тонныг нэг илчит тэргэнд илгээдэг байх нь. Хоногт 30-аад вагон зэсийн баяжмал Эрдэнэтээс "хөдөлдөг” гээд бод доо. Үүний дараа вагоныг нийтээр нь "пүүлж” жингээ барьж буй эсэхийг дахин нягтална.

Ингээд Гаалийнхан бичиг баримтын бүрдэл хийгээд "Эрдэнэт” өртөөнд хүргэдэг. Үндсэндээ дөрвөн удаагийн хяналт шалгалт давж байж энд ирнэ. Харин ч вагоны эргэлтийг түргэтгэх үүднээс хамааралтай гадна, дотнын бүх мэргэжилтнүүд "нэг цэгийн үйлчилгээ”-нд нэгдсэнээр ажил дөмөг бүтэж харагдах. Тооцооны мэргэжилтнүүдийн заншсан ажил нэг мөр болоход зэсийн баяжмал замдаа гарна даа.

Үүнээс цааш ачаа барааны бүрэн бүтэн байдлыг дэлхий нийтийн жишгийн дагуу зуучлагч компани хариуцдаг. Сүүлийн тэмээний ачаа хүнд гэгчээр "Эрдэнэт” үйлдвэрийн хамгийн сүүлийн шат дамжлага болсон энэ цехийн ажлын хариуцлага өндөр.

   Тээвэр ложистикийн албаныхны бас нэгэн чухал үүрэг нь гаднаас ирсэн ачаа барааг хүлээн авч есөн том агуулахад ангилан хадгалж түгээх. "Эрдэнэт” үйлдвэрийн сэлбэг хэрэгсэл, бараа материалын агуулахын үлдэгдэлд Монгол даяараа "нүд унаж” илүү хардаг гэхэд хилсдэхгүй. Угтаа үлдэгдлийн мөнгөн дүнг сонсоод тэр. Оны эхэнд 114 тэрбум төгрөгийн бараа материалын үлдэгдэлтэй байсан бол өнөөдөр 100-аад тэрбум болж буурчээ. Уул уурхайн хүнд үйлдвэрийн технологийн гол тоног төхөөрөмжийн нэг эд анги л гэхэд хэдэн зуун саяын үнэтэй байх нь бий. Белазын зөвхөн нэг дугуй нь 50 гаруй сая төгрөгийн үнэтэй байх жишээтэй. Тасралтгүй үйл ажиллагаатай үйлдвэрийн нэн чухал нь нөөц сэлбэг хэрэгсэл, бараа материал. Харин техник технологийн шинэчлэлийн үр дүнгээр дахин ашиглагдахгүй болсон бараа материалыг компанийн вэб сайтад зурагтай нь монголчлон танилцуулж худалддаг. Нээлттэй хаалганы өдөрлөг хэд хэдэн удаа зохион байгуулснаар түрүү жил нэг тэрбум гаруй, энэ жил 215 сая төгрөгийн борлуулалт хийжээ.

"Эрдэнэт” үйлдвэр эдийн засгийн хувьд бүсээ чангалсан байдалтай байгаа ч энэ зүгт бүтээн байгуулалтын ажил нилээд хийгдэж буй нь онцлог байв. Гадна өнгөө шинэчлээд, эвдэрсэн зам талбайгаа засуулаад авсан байна. Зургадугаар агуулахын шалыг тэгшилж цементлээд резинэн будгаар будаж байхтай таарлаа. Нефть бааз дизелийн түлш хүлээж авдаг технологийн схемээ өөрчилж хүчин чадлаа сайжруулж байна. Мөн газар доор байрладаг түлш агуулах савуудад аваарын дохиоллын төхөөрөмж суурилуулж байх юм. Аюулгүй байдлыг хангах ажил үүгээр зогсохгүй, өвс ургадаг гадна талбайг цементлэх ажил ид үргэлжилж байна. Өвөл болохоор ажил ундарч, удааширч буй нь харамсалтай.

Энэ албаны дарга С.Мөнхтэгш гэж "Эрдэнэт” үйлдвэрт, ган замчидтайгаа эдүгээ 36 жил тасралтгүй ажиллаж буй эрхэм аанай л янзаараа инээвхийлэн угтсан. Туслах машинчаас эхлээд мужаан, слесарь гээд түүнд хийгээгүй ажил энэ цехэд үгүй. Даргын албыг сүүлийн 20 гаруй жил хашиж буй нь нэгийг өгүүлнэ. Түүний амьдрал бүхэлдээ "Төмөр замын цех”-ийн түүх юм.

Тэрээр ажлын байрны тав тух, гоо зүй, эрүүл ахуйг чухалчилдаг нь хэзээнээс анзаарагддаг. Эднийх ажиллагсдадаа цайны цагаар дасгал хөдөлгөөн хийх нөхцөлөөр хангаж фитнес өрөө тохижуулсныг үзлээ. Хувцас солих өрөөнд засвар хийж, 200 хүний хурлын танхим байгуулжээ. Энэ мэт үйлдвэрийнхээ 40 жилийн ойг 40 бүтээлч ажлаар бэлэг барьж угтахаар хичээн ажиллаж буй тус хамт олон ололт амжилт арвин 2017 оныг үдэж байна.

Тэндээс сэтгүүлчийн хувьд "олз” дүүрэн гарахад Зам засварын хэсгийнхэн маань цасны будраан дунд ган замаа тааваараа цэвэрлэсээр байлаа. Бригадын дарга Д.Бямбацогтын дэргэд хэсэг саатахад тэрээр "Илчит тэрэгний хөдөлгөөний аюулгүй байдлыг хангаж, ачаа тээврийг саадгүй, цаг хугацаанд нь буулгахын төлөө бид өдөр бүр замаа тэгшилж, засч ажилладаг. Өвөл төмөр замын царигийг хэмжээнд нь байлгахын төлөө өндөр намыг үргэлж тэнцүүлнэ. Манайх хагас автомат тоноглолтой. Зам автоматаар шилждэг учраас цэвэр байх ёстой. Бас гар сумаар эргүүлж нэг замаас нөгөө рүү шилжүүлдэг. Тэгэхээр зам мөн л цэвэр саадгүй байх учиртай. Гарам ч ялгаагүй” гэж ярьсан. Энэ цаг мөчид агуулахын хашааны үүдэнд зогсоо цагдаа мөн ч сүртэй харагдсан. Тэнхлүүн яваа Тээвэр ложистикийнхондоо улам их амжилт хүсье.

М.ОДГЭРЭЛ

Ахлах мастерын ажлын нэг өдөр

saikhnaa — Wed, 15 Nov 2017 12:47:47 +0800

"Эрдэнэт” үйлдвэрийн ажилчдын автобусанд даруухан бор залуу бодлогошронгуй явна. Түүний бодлыг өөрөөс нь өөр хэн ч үл мэдэх аж. Энэ эр бол Баяжуулах үйлдвэрийн Шүүн хатаах хэсгийн ахлах мастер Ц.Батболд бөлгөө. Түүний ажлын нэг өдөр өглөө 710-ын автобусанд сууснаар эхэлнэ. Тэр ажлын хувцсаа өмсөөд өтгөрүүлэгчийн ачаалал, булингын түвшинг үзэж явав. Хөөрөлт хэр байна. Халиа цэвэр байгаа эсэхийг шалгана. Энэ нь мэргэжлийн хүмүүсийн хэллэг, ахлах мастерын хийх ажлын эхлэл.

     Цааш ажлын байраар явж шөнийн ээлжийн ажлын гүйцэтгэл, цэвэрлэгээ үйлчилгээ хэр байна, технологийн доголдолтой зүйл байна уу, үгүй юу, тоног төхөөрөмжийг засварт хэр бэлдсэн байгааг шалган зөрчил дутагдлыг арилгуулна. Дараа нь хэсгийн шуурхайд орж инженер техникийн ажиллагсдад ажлын явц, тоног төхөөрөмжийн үйл ажиллагаа, авах арга хэмжээний талаар ярилцав. Эндээс гараад тухайн өдрийн ээлжийн ажилчдад хийх ажлын даалгаврыг бичгээр өгч гарын үсэг зурууллаа. Зэс молибдений баяжмалын ачилтын тоог оператороос авч тооны машинд тооцож үзсэнээ үйлдвэрийн зарим удирдлагуудад мэдээлэв.

     Төд удалгүй ажлын байраар дахин явж дэгээ, ган татлагын элэгдлийг шалган ээлжийн мастертайгаа ажлаа зөвлөн зогссоноо баяжмалын уутны чанарыг шалгаж авахаар боллоо. Үйлдвэрийн Чанар хяналтын мастерын хамт уутны тойрог багтаамж, оосор бүч, ачаа даах даацыг шалган туршиж хүлээн авав. Энэ үед би түүнээс баяжмалын уутны талаар лавлахад:
          ...Эрдэнэтийн баяжмалыг өлгийдөж авсан чанга цагаан уут
             Энэ зууны манлай "Эрдэнэт” үйлдвэрийн түнш сайхан уут
             Урагдаж тасардаггүй өнгөлөг цагаан уут
            Уулын үйлдвэрүүдийн хэрэгцээг хангасан үндэсний уут...   хэмээн ёжтой инээмсэглэн хариу нэхсэн харцаар намайг ширтэн маазрав.

     Эндээс тэр их үд болсон тул 40 минут орчим цайлаад механикуудын шуурхайд орж өдрийн ажлын явц, тоног төхөөрөмжийн үйл ажиллагаа авч буй арга хэмжээний талаар мэдээлэл хийв. Дараа нь тэр тасралтгүй үйл ажиллагаатай технологийн горимоо хянаж, хөдөлмөр хамгааллын хэрэглэл болох амны хаалт, бээлий, саванг ээлжийн ажиллагсдад хуваариллаа. Үүний дараа хэсгийн хана, багана, металл хийцэд наалдсан бохирдсон зүйлийг арилгуулж хогийн машин захиалан ачуулах ажил үргэлжлэв. Ингээд усанд орж 1710-ын автобусаар гэртээ харих болж би ч түүнийг дагасаар... Түүний нэг өдрийн ажил энд хүрээд дуусахгүй орой, өглөө таван удаа үйлдвэрлэлийн үйл ажиллагааны талаар утсаар мэдээ авч зөвлөгөө өгч ажилладаг гэсэн. Ер нь ийм хүмүүсийн нуруун дээр үйлдвэрлэлийн тасралтгүй үйл ажиллагаа явагддаг гэсэн далд бахархал төрснийг нуух юун.

     Тэр хэсгийн даргатайгаа хагас, бүтэн сайн өдөр хариуцлагатай жижүүрийн ажил гүйцэтгэнэ. Шаардлагатай тохиолдолд шөнө орой, хагас бүтэн сайн, баяр ёслолын өдөр ч дуудлагаар ажиллана. Утсаа унтрааж болохгүй заалттай. Өндөр үүрэг хариуцлага хүлээсэн ажиллагсдын нэг Ц.Батболд мастер юм. Тэр "Эрдэнэт” үйлдвэрт би 28 жил ажиллаж байна. Дасал болсон ажил, танил болсон үнэр нь хүртэл сайхан шүү” гээд мар мар инээх. Тэгснээ "ачигч-оосорлогч,хатаагч, ээлжийн мастер, ахлах мастерын ажил хийж ирэхдээ би сэтгэл хоёрдож явсан удаа байхгүй. Яагаад гэвэл би мэргэжилдээ дуртай. Иймээс ихийг бүтээх гэсэн чин эрмэлзэлтэй, өөрөөс шалтгаалах бүхнийг сэтгэлээсээ хийж ирлээ. Сэтгэл байхад ажил оргилж байдаг. Ямар ч ажлыг өөриймсөг сэтгэлээр хийхэд үр дүн гарна” гэв. Миний хувьд ахлах мастерын нэг өдрийн ажилтай танилцсан нь энэ.

     Ямартаа түүнийг ээлжийн амралттай байхад орлох хүн ахлах мастер их ачаалалтай ажилладаг юм байна. Ц.Батболд мастер хурдан ажилдаа ороосой гэж явах вэ дээ. Тэрбээр 106 ажиллагсдын ээлжийн амралт, хүн хүчний ажлын хуваарилалт,цэвэрлэгээ үйлчилгээ, үйлдвэрлэлийн үйл ажиллагаанд цаг ямагт хяналт тавьж ажиллана. Чөлөөтэй, өвчтэй хүний оронд хэн нэгнийг томилон, ажил хийдүүлэхгүй, сул зогсолтгүй, бүтээмж өндөртэй ажиллуулж ирсэн дадлага туршлагатай нэгэн болохыг би түүний ажлын нэг өдрийг сурвалжлахдаа мэдсэн юм.

                                                                                                                             Т.БАТЧУЛУУН

“Гоё айл”-ын эзэн

saikhnaa — Fri, 06 Oct 2017 11:27:06 +0800

" Гоё айл”...Энэ тодотгол нэрийг хөрш зэргэлдээ айл хотлын хүмүүс өгснөөс айлаас айл, амнаас ам дамжин яригдах болжээ. "Өөдлөх айл үүднээсээ” гэгчээр "Гоё айл”-ын хашаа бусдаас ялгарах өлзий утсан хээтэй. Зүүн талын жижиг хаалганы тотгонд Монгол улсын төрийн далбаа намирна. Зуугийн поошгийг хуваагаад цэцгийн сав болгочихож. Дуртай газраар явах бус дурайсан замаар алхан хашаанд оров. Сагсны шийдэнд нь хүүхэд,багачууд бөмбөг тоглож, саравчны хажуухан талд нохойн тохилог оромж харагдана. Бүх юм эмх цэгцтэй,байр байрандаа... "Гоё айл”-ын эзнийг Тэгшбаярын Банзрагч гэдэг. "Эрдэнэт” үйлдвэрийн Авто тээврийн байгууллагын Хүнд даацын машин механизмын хэсэгт каразын жолооч ажилтай. Үйлдвэрлэл технологийн үйлчилгээний тоног төхөөрөмж, хог хаягдлыг зөөх дотоод тээврийн ажлыг каразын жолооч нар гүйцэтгэдэг. Зуны улиралд илүү ачаалалтай. Барилгын болон газар шорооны ажил эхлэнгүүт ачаалал нэмэгдэнэ. Өвөл технологийн тээвэр хийнэ. Зам талбайн халтиргаа гулгаанаас урьдчилан сэргийлэх зорилгоор шороо ачиж асгах ажил гүйцэтгэнэ. 15 каразын жолоочийг амраах,өвчтэй хүний оронд нөхөж ажиллах ээлжийн жолоочийн үүргийг Т.Банзрагч гүйцэтгэж иржээ. Монгол улсын баруун хүрээ хэмээх алдартай газар бол Эрдэнэ зуу. Эндэхийн Шанхын хийд нь өндөр гэгээн Занабазарын анхны бүтээл гэгддэг. Түүний аав нь Шанхын хийдийн бууринд эхээс хүй цөглөжээ. Иймээс мань эр яах аргагүй Өвөрхангай аймгийн Хархорин сумын харьяат гэж өөрийгөө тодотгов. Ааваас өвлөсөн хөдөлмөрийн хүмүүжилтэй, нямбай, ажигч, юмхнаар юм хийдэг бүтээлч зан чанар зөвхөн түүнийх гэмээр. Аав нь Хархорины гурилын үйлдвэрт 30 жил Ерөнхий нягтлангаар ажилласан Осорын Тэгшбаяр гэж хүн байж. Харин ээжийг нь "өндөр” Цэрэндүгийн Лхамсүрэн гэдэг. Тэр нэг эгч, зургаан эрэгтэй дүүтэй. Айлын том залуу болохоор ус,түлээ, хоол ундаа бэлтгэх, дүү нарынхаа хувцас хунарыг угаах гэр орны хар бор ажлыг багаасаа хийжээ. Түүний өвөө, эмээ малчин хүмүүс. Удмаасаа өвлөсөн хөдөлмөрч зан чанараар тэр бахархдаг. Тэрбээр Дархан хотын Анагаахын техникумыг хүний бага эмч мэргэжлээр төгсжээ. Түүний туулж өнгөрүүлсэн амьдралын амттай яриаг уншигч та бүхэнд хүргэе.

Багын мөрөөдөл биелсэн

- Би багын мод тарих сонирхолтой. 1983 оноос хашаандаа чацаргана,сармис тарьж эхэлсэн. Гэр хороололд хэрхэн яаж ая тухтай амьдарч болох вэ гэсэн төсөөлөл хүүхэд насанд суучихсан байлаа. Гоё сайхан байшин барьж, өөрийн гараар тохижуулж амьдрах юмсан гэж мөрөөдөж явлаа. Энэ мөрөөдөл биелсэн. Нэг хэсэгтээ ажил,амьдралын нөхцөлөөс шалтгаалаад цаг хомс байлаа. Хань маань хүнд өвчтэй. Эмнэлгээр их явна. Гэр орныхоо болон эрхэлсэн ажлаа хийнэ. Тэр үед хашааны газар аваад аль эрт тохитой амьдарч болох байлаа. Нэг л болж өгөөгүй юм. 2011 онд байраа зараад энэ хашаанд амьдарсан. Манайхан гэр хороололд гарахад их дургүй байсан л даа. Зүлгэн дээр нь гишгэхгүй арчиж тордоод байхаар онгон байгаль өөрийнхөө жамаар үржиж төлжих юм. Манай хашаанд байгалиасаа эмчилгээнд хэрэглэдэг цэцэг, гүзээлзгэнэ хүртэл ургасан шүү. Анх 1993 онд Авто тээврийн байгууллагад засварчнаар ажилд орж байлаа. Энэ уулын буянд сайхан амьдарч явна. Би хүний амьдралын жаргал, зовлонг амссан. Миний анхны хань хэдэн жилийн өмнө хүнд өвчний улмаас нас нөгчсөн. Түүнийгээ орлох ханьтай боллоо. Нэрийг нь Борын Болормаа гэдэг. Энэ том үйлдвэрийн нэг эд эс ажилчин нь болсондоо баярлаж явдаг. Ажлаас ирээд л ар гэрийнхээ юмыг хийнэ. Маргаашийнхаа ажлыг төлөвлөнө. Хашааны баруун талд хоёр хээ тавина. Дөрвөн банз хадна гээд л...

Залуучууд нүдээ аниад л орон сууц уруу зүтгээд байна

-Манай энэ байр 66 метр квадрат. Цахилгаан халаагуураар дулааныг нь шийдсэн. Залуучууд нүдээ аниад л орон сууц уруу зүтгээд байна. Тэгэхэд манайх орон сууцны зээлийн дарамтгүй амьдардаг. Манайхан хэтэрхий бэлэнчлэх сэтгэлгээтэй юм. Авсан байрныхаа зээлийг 20 жил төлнө гээд бод. Аливаа хүн сэтгэл санаа тайван аж төрөх ёстой. Хашаа байшинд амьдрах олон талын ач холбогдолтой. Эрүүл агаартай,ая тухтай. Энэ жил хашаандаа дөрвөн ханатай, сийлбэртэй гэр барилаа. Шалны халаалттай. Бүх юмыг нь цахилгаанаар шийдсэн. Цахилгааныг нь шөнийн тарифаар ажиллуулахаар хэмнэлттэй.Энэ хашаанд барьсан сийлбэртэй гэрийг захиалгаар хийлгэсэн. Яс мод сайтай. Ер нь манай Хархорины залуучууд их уран. Занабазараас улбаатай байж болох юм. Уран сийлбэрч Чувамэд гуай энэ нутгийн хүн. Монгол улсын Ерөнхийлөгчийн сэнтийг манай ангийн хүү урласан байх жишээтэй. Захын залуу л сийлбэр хийнэ шүү. Би нэг сая төгрөгийн цалинтай. Сард дөрвөн зуу мянган төгрөг зарцуулаад сайхан орчинд амьдарч болж байна. Нэг үнэтэй архи 20-100 мянган төгрөгөөр авлаа гэхэд тухайн хүн өөрийгөө хордуулахаас цаашгүй. Энэ мөнгөө өөртөө зарцуулчих хэрэгтэй. Цахилгаан зуухыг хүйтэн үед халаачихна. Халуун өдөр унтраачихдаг. Энэ байрны нойлын асуудлыг шийдчихсэн. Энэ бүхэн миний дөрвөн жилийн хөдөлмөр.

Аав маань урт наслаагүй нь харамсалтай

-Манай дүү нар архи, тамхи хэрэглэдэггүй. Ааваас уламжилсан юм энэ. Эргээд бодоход аав минь биднийг их сайхан хүмүүжүүлсэн байдаг. Өлсгөөгүй, өвчин зовлонд нэрвэгдүүлээгүй. Эрүүл саруул муу зуршилгүй өсгөсөн байна. Одоо бид сайн сайхан амьдарч байна. Харин аав маань урт наслаагүй нь харамсалтай. (Бодлогошров.) Ээжийгээ л их хайрлах юм. Долоон банди төрүүлсэн хүн дээ, миний ээж. Би хүмүүст эрүүл,хөдөлмөрч бай гэдэг. Би зуны өглөө таван цагт босож цэцэг, жимсээ усалчихаад дугуйгаар ажилдаа явдаг. Орой эрт хоолоо идсэн байх ёстой. Энэ нь миний амьдралдаа баримталж ирсэн зарчим юм. Манай хүмүүсийн сэтгэхүй их дорой. Автобусны буудал барина гэж гурилдах юм. Түүнийг нь эвдээд хаячихна. Гудамжиндаа би хоёр сагсны шийд зоосон. Нэг мэдэхэд л хуга татаад аваад явчихна. Би эргүүлээд л шийд хийчихдэг. Одоо овоо хэдэн сар болж байна.

165-р ангид нууцын албаны бичээч цэрэг явлаа

-Би Дорнодын Халх голд цэргийн алба хаасан. Агаараас эсэргүүцэн хамгаалах 065-р анги гэж Шар хаданд байлаа. Энэ ангийн хөгжмийн салаанд анх бүрээ үлээж явлаа. Айлт хөгжим тоглоно. Тэгтэл миний төрсөн дүүг Дорнодын Халх гол уруу хуваарилчихсан. Дүү маань надаас салахгүй гээд уйлаад болдоггүй. Аргагүй шүү дээ, дөнгөж арав төгссөн хүүхэд чинь. Харахаар л өрөвдмөөр... Тэгээд цэргийн дарга нараасаа гуйн байж би дүүтэйгээ Халх голд очсон. 165-р ангид нууцын албаны бичээч цэрэг явлаа. Түрүүч цолтой. Тэр үед канон байхгүй. Бүх зүйлийг гараар бичнэ. Шрифтээр бичиж сурсан минь их хэрэг болсон. Шинэ жил, майн баяраар ханын сонин гаргана. Би цэргээс халагдаж ирээд Эрдэнэ зуу хийдэд хоёр жил зураачаар ажилласан.

Амьдралын амтыг би ажлаас олж авдаг

-Миний хувьд хөдөлмөрлөж л байвал ядарна гэсэн ойлголт байдаггүй. Би орон сууцанд хөдөлгөөнгүй, идэвхгүй амьдарч чаддаггүй. Одоо би, цайгаа уучихаад л гарч цэцэг,жимснийхээ үрийг түүнэ. Дараа жилийнхээ хөрсийг бэлдэнэ. Цэцгүүдээ сугална гээд ажил мундахгүй их байна. Би ямар ч ажлыг хийхдээ ядрахыг мэддэггүй. Тэгэхээр зарим хүмүүс хоёр хүрз шороо хаячихаад л ядраад байна. Эцэж үхлээ гэх нь холгүй. Ийм хүмүүсийг би ер ойлгодоггүй. Хийсэн юм байхгүй. Их ярих юм. Дарга харахаар бүгд хөдөлдөг. Түүнийг явсны дараа хэн ч ажил хийхгүй байж болохгүй биз дээ. Хүмүүс их сонин болчихсон. Би бол хэнээр ч заалгахгүй хийх ёстой ажлаа цаг тухайд нь чанартай хийдэг. Би амьдралын амтыг ажил хийж олж авдаг.

Хамт олноо хөдөлмөрөөр үлгэрлэсэн

-Хүмүүс тэр амралт,энэ амралтын газар очно гээд л явах юм. Би тэгдэггүй. Хашаандаа ажил хийгээд л амарчихдаг. Гэр бүлийн гишүүд маань та хүмүүст үлгэр дуурайлалтай зөндөө юм хийлээ. Одоо сайхан амар гэх юм. Хүн оногдсон ажлаа чин сэтгэлээсээ хийх ёстой. Хоёрдугаарт би хамт олноо хөдөлмөрөөр үлгэрлэсэн гэж боддог. Манайхан намайг их дэмжиж ажилладаг. Намайг юм хийгээд эхлэхээр дагаад л хийдэг байхгүй юу. Манай хэсгийн 45 хүн ажлын ард сууж яваагүй. Би сагсан бөмбөгийн спортын мастер. Хамт олноо тэмцээнд ороход нь чадлаараа дэмждэг. Ажилдаа унадаг дугуйгаар явдаг. Дугуйгаар ажилдаа яваад дөрвөн жил болж байна. Хүмүүс миний энэ үйлээс санаа авч зөв амьдралын хэв маяг олж аваасай.

Эрдэнэтийн залууст цэцэрлэгт хүрээлэн бариад өгчих юмсан

-Монгол улсын иргэний хувьд Эрдэнэтийнхээ залуучуудад чөлөөт цагаа өнгөрүүлэх нэг сайхан орчин бүтээгээд өгчих юмсан. Жижиг хэмжээний цэцэрлэгт хүрээлэнгийн газар хүсээд зургаан жил болж байна. Газрыг нь шийдээд өгчихгүй юм. Зураг,төслийг нь гаргачихсан. (Үзүүлэв.) Гэтэл дуртай газраа хүмүүс байшин барьчих юм. Их цаг хугацаа алдлаа. Хоёр га газар олгочихсон бол би зургаан жилийн дотор зөндөө юм хийчих байлаа. Амарын талбай, гендирекцийн усан оргилуур хоёрт л Эрдэнэтийн хүүхэд,багачууд бужигнах юм. Чөлөөт цагаа зөв өнгөрүүлчих өөр газар алга. Надад бодож төлөвлөсөн ажил их байна. Манай хашааг олон хүн ирж үзсэн. Дуурайгаад юм хийх хүсэлтэй хүмүүс байна. Намайг ажил тараад ирэхэд л багачууд манай хашаанд тоглох гээд ирчихнэ. Та нар зүлгэн дээр гишгэхгүй, цэцэг жимсний мод бут сүйтгэхгүй тоглоно шүү гэж тэдэнд хэлдэг. Хүүхдүүд болохоор үнэндээ үгнээс гарахгүй. Банзай ах ирлээ гээд л 20-иод хүүхэд шуугилдчихна. Бүр харанхуй болтол тоглоно гээч. Тэдэнд тоглож наадах орчин алга. Тэд бидний ирээдүй биз дээ.

-"Мянга сонсохоор нэг үз” гэдэг. Үйлдвэрийн эгэл жирийн нэг ажилтан залуу Т.Банзрагч цалингаараа хэрхэн яаж сайхан амьдарч болдгийг ийнхүү амьдрал дээр харуулж явна. Хүн бүр энэ залуу шиг аж ахуйч, хөдөлмөрч,бүтээлч сэтгэхүйтэй болчихвол хөгжил ойрхон мэт. Тэр хашаандаа 10-аад төрлийн цэцэг тарьж, есөн янзын жимсний мод суулгажээ. Давжаалин, агч, үхрийн нүд, мойл, чацаргана,нарс, интоор тарьснаа он, сар,өдөртэй нь пайзан дээр тэмдэглэсэн байх юм. Ийм л хөдөлмөрч хүмүүс баялгийг жинхэнэ утгаар нь бүтээдэг юм байна гэсэн гэгээн бодол өвөрлөн бивээр тэднийхээс гарав. Түүний санаачилж хийсэн юм бүхэн одоо ч нүдэнд харагдсаар...

Т.БАТЧУЛУУН

Ж.МӨНХ-ОРГИЛ ХҮҮХЭД, ЗАЛУУЧУУДЫН АСУУДАЛ ХАРИУЦСАН ЗӨВЛӨХӨӨР ТОМИЛОГДЛОО

tonshuul — Tue, 29 Nov 2016 15:41:34 +0800

Аймгийн Засаг даргын зөвлөхөөр Жаргалсайханы Мөнх-Оргил ажиллаж байна. Тэрээр хүүхэд, залуучууд, биеийн тамир, спорт, аялал жуулчлалын асуудлыг хариуцах юм. Ж.Мөнх-Оргил төрийн удирдлагын менежер, металлургийн менежер мэргэжилтэй. 2015 оноос Хүмүүнлэгийн ухааны Их сургуулийн "Эрдэм”-ийн сургуулийн Бизнесийн удирдлага, хүний нөөцийн магистрантурт сурч байна. Тэрээр орон тооны бус зөвлөхөөр ажиллана.

2008-2009 онд Орхон айгийн Оюутны холбооны ажлын албаны дарга, 2011-2013 онд Хот тохижуулах газрын хэсгийн дарга, 2007-2015 онд Орхон аймгийн НАМЗХ-ны тэргүүлэгч, Баян-Өндөр сумын МАН-ын хорооны тэргүүлэгч, Аймгийн МАН-ын хорооны Улс төрийн ахлах ажилтанаар ажиллаж байна.

Эрдэнэтийн хос багана

tonshuul — Sun, 27 Nov 2016 21:45:41 +0800

Төрсөн нутаг орондоо эзэмшсэн мэргэжлээрээ ажиллан, сайхан амьдралыг цогцлоож буй гэр бүлүүд олон бий. Тийм нэгэн залуу гэр бүлийн төлөөлөл нь төрөлх Орхон аймагтаа ажиллаж амьдарч буй Д.Сосорбарамынх юм.
Өрхийн тэргүүн Д.Сосорбарам 2013 онд МУИС-ийн Монгол хэл соёлын сургуулийг, Монгол хэлний багш, судлаач мэргэжлээр, гэргий Л.Лхагвасүрэн МУИС-ийн Нийгмийн шинжлэх ухааны сургуулийг нийгмийн ажилтан мэргэжлээр мөн л 2013 онд төгсчээ. Өдгөө Д.Сосорбарам Орхон аймгийн Баян-Өндөр цогцолбор сургуульд монгол хэл, бичгийн багшаар гуравдахь жилдээ ажиллаж байгаа бол, Л.Лхагвасүрэн Орхон аймгийн "Залуучуудын хөгжлийн төв”-д хоёрдахь жилдээ нийгмийн ажилтнаар ажиллаж буй.
"Орхон аймаг нь бусад аймаг, орон нутгийг бодоход илүү хотжиж иргэншсэн, нийслэлтэйгээ ойр, залуу мэргэжилтэн хөгжих боломж харьцангуй ихтэй,үр хүүхдүүдээ цэвэр, аюул багатай, амгалан тайван орчинд өсгөх боломж дүүрэн.Тэгээд ч гэр бүл, өссөн нутгийн гудамж талбай, соронздон татах хүч энд их олон байсан юм байна. Ер нь тэгээд л хоёулаа эргэлзэж тээнэгэлзэж бодох зүйлгүй энд л амьдрах ёстой юм шиг сургуулиа төгсөөд л шууд Эрдэнэтдээ ирсэн дээ. Эрдэнэт оюун санааны амьдралын хувьд бол нэлээд хоцрогдсон байгааг удалгүй ойлгосон ч, нутагтаа амьдралаа цогцлоох зорилгоосоо ухралгүй харин ч залуу үеийн урлагийн болоод оюун санааны ертөнцийг шинээр нээж, төрүүлэх юмсан гэсэн санаа бодол ч нэмэгдсэн. Ерөнхийдөө хүсч буй газраа хайх биш өөрсдөө бий болгох хэрэгтэй юм байна гэдийг ч ухаарч байгаа” хэмээн ярих энэ хосууд бол Монголын утга зохиолын нэн шинэ үеийн төлөөлөл болсон шинэ сэрэхүй, өвөрмөц илэрхийлэлтэй уран бүтээл туурвигчид. Залуу яруу найрагчдийн дунд ихээхэн нэр хүнд, чансаа өндөр тэр хэрээр өрсөлдөөн ширүүн болдог хайрын шүлгийн "Цагаан Уул 2015” наадамд Д.Сосорбарам түрүүлж, хань Л.Лхагвасүрэн нь аман хүзүүдсэн нь Эрдэнэтчүүдийн магнайг тэнийлгэсэн явдал болжээ. Тэдний, "Залуу үеийн урлагийн болоод оюун санааны ертөнцийг нээнэ” гэсэн нь хоосон үг биш бөгөөд Д.Сосорбарам уран бүтээлчийн хувьд өдөлж, өөрийгөө нээн олсон 50 гаран жилийн замналт "Уран Өд” яруу найргийн дугуйлангаа МУГБ Д.Мандахсангаас өвлөн авч Эрдэнэтээр овоглогдох ирээдүйн авъяас билэгт яруу найрагчдийг бэлтгэж буй.

Одоо бодоход нээрээ бид хоёр Улаанбаатарт үлдэж болох тухай огт ярилцаагүй магадгүй хэн хэнд нь тийм бодол байгаагүй болоод л тэгсэн байх.

"Одоо бодоход нээрээ бид хоёр Улаанбаатарт үлдэж болох тухай огт ярилцаагүй магадгүй хэн хэнд нь тийм бодол байгаагүй болоод л тэгсэн байх. Шууд л нутагтаа ирж ажил хайж, амьдралаа эхлүүлэх байшин барих ажилдаа орсон. Магадгүй цаанаасаа тэгэх ёстой байсан ч байж болох юм. Ер нь оюутан цагийн ихэнхи найз нөхөд хотдоо шингээд үлдсэн ч бид хоёр бусдын жишгийг дагахыг хүсээгүй ээ. Төрсөн нутагтаа амьдрах хавьгүй дээрийг өдөр ирэх тусам л мэдэрч байна. Адаглаад л туслаж дэмжих аав ээж дэргэд байна. Залуу боловсон хүчний хувьд хувь нэмрээ оруулах шинийг хийж санаачлах зүйл ч нилээн байгаа. Байгаль цаг уурын хувьд ч Эрдэнэт өвөлдөө дулаахан. Хотыг бодоход агаарын бохирдол багатай,бага насны хүүхэдтэй хүмүүст юм юмандаа ойр амар.

Гэр бүлдээ болон өөртөө зарцуулах цаг хотынхоныг бодвол хавьгүй их. Түгжрэлгүй, стресгүй амар тайван орчин цогцолсон газар даа” гэж гэргий Л.Лхагвасүрэн ярьж байна.
Нутаг орондоо эзэмшиж сурсан мэргэжлээрээ ажиллахын зэрэгцээ уран бүтээл, хүсэл тэмүүллээ орхигдуулж гээлгүй явахын цагт төрсөн нутгийн уул ус ивээл буянаа хайрладгийг энэ гэр бүлийн амьдралаас харж болох. Д.Сосорбарамынх тэрсхэн хүү, охинтой өнөр бүл. Тэд Азийн хөгжлийн сангийн хөрөнгө оруулалттай МОН2301 буюу орон байрны нөхцөл сайжруулах зээлийг 2015 онд авч зун нь 10*15-н харьцаатай байшинг аав, ахтайгаа барьжээ.
"2014 зун байшингийнхаа блокийг хуурай ахынхаа блокны машинаар өөрөө зунжин ажиллаж хийлцэж авсан. Тийм ч учраас байшингийн минь хундаамнаас дээвэр хүртэл гэр бүлийн минь хөлс шингэж бүтсэн гэж хэлж болно. Өөрсдийн хүчээр амьдралаа босгохын үнэ цэнэ амтыг байшингаа хараад л мэдэрдэг дээ. Гаднаасаа сайхан харагдаж байгаа байшингийнхаа дотор нь ч гэсэн 2 хүүхэдтэйгээ аз жаргалтай сайхан амьдрана даа” хэмээн өрхийн тэргүүнийг хуучлахыг сонсоход амьдралын урам зориг, гэр бүлийн аз жаргалыг эрхгүй мэдрэв.
Тэдний гэр бүлийн сарын дундаж орлого ГОК-ын цэвэрлэгчийн сарын цалинтай тэнцэх хэмжээний ч тэдний цалин амьдралд нь хангалттай хүрэлцдэг гэнэ. ГОК-т л ажиллаж байж Эрдэнэтэд хангалуун сайхан амьдрана, яаж ийж байгаад ГОК-т шургалаад орчих юмсан гэх явцуу найдвар, зорилгыг тэд таашаадаггүй аж.

Үнэнийг хэлэхэд ГОК-ын ажилчдын хөлд нь чирэгдэх тохиолдол бий шүү.

"Үнэнийг хэлэхэд ГОК-ын ажилчдын хөлд нь чирэгдэх тохиолдол бий шүү. Цалин буух үед энэ зөрүү бүр ч их анзаарагддаг. Гэхдээ яах вэ бидний хүсэл мөрөөдлийг хэн ч хулгайлж чадахгүй шүү дээ. Бидний хувьд амьдрал дөнгөж эхэлж байна. Хичээвэл бүх зүйл сайхан болно гэдэгт итгэдэг” гэх Л.Лхагвасүрэнгийн ярианаас Эрдэнэтийн залуусын амьдралын жишгийг тандаж болохоор... Тэд Эрдэнэтийн гурав дахь үеийнхэн. Эрдэс баялаг, эрдэм оюуны уурхай болсон энэ л хотынхоо өнөөдрийг үүрч яваа одоо цагийнхан. Орхон аймаг, Эрдэнэт хотын ирээдүйн эзэд, залгамж халаа энэ л гэр бүлийн дор бэлтгэгдэн, сурч хүмүүжиж, боловсрол олж байгаа гэж бодохоор нэг л гэрэл гэгээтэй.
http://eagle.mn/r/20384

Орхон аймгийн Орос 4-р сургуулийн сурагч Б.Есүй олимпод эх орноо төлөөлөн оролцоно

saikhnaa — Fri, 03 Jun 2016 10:59:45 +0800

РИО 2016 олимпын их наадмын усанд сэлэлтийн 50 метрийн өврөөр даллах төрөлд Монгол улсаас эрэгтэй,